Disa ditë më parë, Skyweb.al raportoi për shumën e konsiderueshme të parave që Bashkia Himarë, nën drejtimin e Vangjel Tavos, po shpenzon për aktivitete dhe evente gjatë javëve të fundit.
Në qendër të vëmendjes ka qenë edhe tenderi me fond 9 800 000 lekë (pa TVSH) për “Organizim i aktivitetit të çeljes së sezonit veror”, i cili është shoqëruar me ankesa në Komisionin e Prokurimit Publik, duke nxjerrë në pah problematika dhe mungesë transparence mbi mënyrën se si përdoren fondet publike si edhe dyshime për paracaktim të fituesit përmes kritereve teknike.
Bëhet fjalë për një tender, i cili një vit më parë u fitua nga një subjekt i lidhur me prodhimin e patates në Pogradec, duke ngritur pikëpyetje mbi kriteret dhe përzgjedhjen.
Edhe këtë vit, interesi për fituesin ishte i lartë, por zhvillimet e fundit kanë shtuar më shumë dyshimet sesa kanë dhënë përgjigje.
Pas shpalljes së tenderit, kompania “Think Advertising” depozitoi një ankesë pranë KPP, ku kundërshtonte në mënyrë shumë të detajuar dhe profesionale kriteret teknike të vendosura nga Bashkia Himarë, duke kërkuar ndryshimin e tyre.
Argumentimi i kompanisë ishte i fortë dhe çështja kishte kaluar në fazë shqyrtimi nga KPP, por këtu duket se nisin skemat, telefonatat, premtimet…
Por, në mënyrë të papritur dhe pa asnjë sqarim teknik, siç skyweb.al ka konstatuar në KPP, kompania është tërhequr nga ankesa.
Në kërkesën dërguar KPP-së, ajo justifikohet me formulimin: “Pasi jemi të angazhuar në punë të tjera dhe e kemi të pamundur për vazhdimin e procedurave të ankimit ndaj tërhiqemi nga ankesa e depozituar në KPP.”
Ky arsyetim, i përgjithshëm dhe pa lidhje me thelbin e pretendimeve, duke ditur edhe se përballë ndodhet një “usta” si Vangjel Tavo, që tenderët e aktiviteteve kulturore ua jep edhe një fermeri patatesh pa e vrarë mendjen fare, ka shtuar dyshimet mbi atë që ndodh realisht pas kuintave për këtë procedurë.
Me tërheqjen e ankesës, Komisioni i Prokurimit Publik e mbylli menjëherë çështjen, pa hyrë në shqyrtimin e pretendimeve, duke i hapur rrugë Bashkisë Himarë të vijojë procedurën për shpalljen e fituesit.
Praktika e deritanishme tregon se tërheqje të tilla shpesh shoqërohen me zhvillime të tjera në vijim, siç janë “tenderët kompensues” në javët apo ditët e ardhshme.
Skyweb.al do të ndjekë këtë procedurë për të parë nëse emri i kësaj kompanie do të shfaqet si fituese në këtë apo në procedura të tjera të ngjashme në vijim. /skyweb.al
