Kryeministri Edi Rama ka nisur vizitën e tij në Athinë, ku është takuar me homologun e tij grek, Kyriakos Mitsotakis, në një moment që shihet si i rëndësishëm për ecurinë e marrëdhënieve mes dy vendeve.
Në një reagim publik, Rama theksoi se raporti me Mitsotakis është ndërtuar mbi një “miqësi të posaçme”, e cila, sipas tij, është formësuar gjatë përpjekjeve të përbashkëta për modernizimin e dy vendeve dhe për forcimin e bashkëpunimit dypalësh.
Sipas kryeministrit shqiptar, komunikimi mes dy qeverive ka qenë i drejtpërdrejtë dhe i hapur, edhe në momentet më të vështira, duke ruajtur respektin reciprok dhe duke krijuar terrenin për zgjidhjen e çështjeve të mbartura ndër vite.
Rama bëri të ditur se aktualisht po punohet për të kapërcyer përfundimisht këto çështje, me synimin që brenda këtij viti të arrihet një marrëveshje e re partneriteti strategjik mes Shqipërisë dhe Greqisë.
Vizita në Athinë shihet si një tjetër hap në këtë drejtim, ndërsa pritet që në vijim të ketë zhvillime konkrete në raportet mes dy vendeve, të cilat prej vitesh mbeten të ndikuara edhe nga çështje të pazgjidhura historike dhe diplomatike.
