Kredia në ekonomi po ndjek një trajektore të pabarabartë, ku përfituesit kryesorë mbeten bizneset e mëdha, ndërsa individët dhe bizneset e vogla përballen me kufizime të dukshme, sidomos në financimin e banesave dhe investimeve.
Kjo tablo del nga të dhënat e Bankës së Shqipërisë në raportin “Vrojtimi i Aktivitetit Kreditues për tremujorin e parë 2026”.
Sipas raportit, kërkesa për kredi nga bizneset është rritur, por kjo rritje mbështetet pothuajse tërësisht nga biznesi i madh.
Ky segment ka kërkuar më shumë financim për investime dhe për kapital qarkullues, ndërsa bizneset e vogla dhe të mesme kanë shfaqur kërkesë më të dobët dhe kanë përfituar më pak nga lehtësimi i kushteve.
Kjo tregon një përqendrim të kreditimit në pak aktorë ekonomikë, duke lënë jashtë pjesën më të madhe të sipërmarrjes.
Në të njëjtën kohë, tregu i banesave po reflekton kufizime të qarta në kreditim. Kërkesa për kredi për blerje apartamentesh ka rënë, një zhvillim që bankat e lidhin drejtpërdrejt me vonesat në zbatimin e kuadrit ligjor për vlerësimin e pasurive të paluajtshme dhe me kufizimet rregullatore në fuqi.
Kjo situatë ka frenuar financimin e pasurive të paluajtshme, duke ndikuar jo vetëm te qytetarët, por edhe te sektorët e lidhur me ndërtimin dhe investimet afatgjata.
Paralelisht, një tjetër zhvillim i rëndësishëm është rritja e kredive për konsum.
Bankat kanë lehtësuar kushtet pikërisht në këtë segment, përmes uljes së marzheve, rritjes së shumës së kredisë dhe zgjatjes së afateve të shlyerjes. Si rezultat, kërkesa për kredi konsumatore është rritur, ndërkohë që kreditimi për investime dhe për banesa nuk ka ndjekur të njëjtin ritëm.
Kjo prirje tregon një zhvendosje të strukturës së kreditimit, ku ekonomia mbështetet gjithnjë e më shumë te konsumi i financuar me borxh, ndërsa financimi i investimeve dhe i pasurive të paluajtshme mbetet i kufizuar./skyweb.al
