Michael O’Leary, njeriu që revolucionarizoi qiejt e Europës duke i bërë fluturimet më të lira se një biletë treni, sapo ka shpallur “skadencën” e ofertave të çmendura.
Sipas detajeve të fundit të raportuara nga La Repubblica, gjiganti irlandez po përgatitet për një kthesë të fortë menjëherë pas muajit maj, duke lënë pasagjerët në ankth për pushimet e verës.
Arsyeja kryesore e këtij alarmi është karburanti. Ryanair, si çdo korporatë e madhe, përdor një strategji që quhet “hedging” – blerja e naftës me çmim të bllokuar muaj më parë për të shmangur luhatjet e tregut. O’Leary ka konfirmuar se këto kontrata mbrojtëse skadojnë në maj.
Nga qershori e tutje, Ryanair do të jetë “e zbuluar” para çmimeve të larta të naftës. Nëse nafta shkon në 150 dollarë për fuçi, siç parashikojnë disa skenarë pesimistë, kompania do të përballet me një kosto ekstra prej 600 milionë eurosh.
Në botën e aviacionit, kjo llogari është e thjeshtë: Koston nuk e mban kompania, por e paguan pasagjeri te çmimi final i biletës.
“Diktatura” e aplikacionit: Zhduken sportelet e check-in
Përveç shtrenjtimit, O’Leary po shfrytëzon këtë moment krize për të implementuar një ndryshim rrënjësor operacional: Zhdukjen totale të sporteleve fizike të check-in.
Synimi është që çdo procedurë të kalojë 100% përmes aplikacionit celular.
Ky nuk është thjesht modernizim, por një lëvizje për të ulur kostot e personelit në aeroporte. Për pasagjerët, ky rregull i ri vjen me një rrezik të lartë: Kushdo që nuk është mirë me “teknologjinë” ose harron të bëjë check-in në telefon, do të përballet me tarifa penalizuese që pritet të kalojnë çmimin e vetë biletës. Është një strategji ku gabimi i udhëtarit kthehet në fitim neto për kompaninë.
Prapaskena tjetër që po rëndon situatën lidhet me flotën. Vonesat sistematike të Boeing në dorëzimin e avionëve të rinj kanë bërë që Ryanair të ketë më pak kapacitet se sa kishte planifikuar për verën e vitit 2026.
Kur kërkesa për të udhëtuar është në kulm dhe numri i avionëve është i kufizuar, rregulli i tregut është i pamëshirshëm: Biletat e mbetura shiten me çmime “premium”.
O’Leary e ka vënë gishtin te Mbretëria e Bashkuar si tregun më të rrezikuar, duke përdorur këtë si presion ndaj qeverive për të ulur taksat e aviacionit.
Por ky mesazh vlen për të gjithë: Modeli i biznesit ku pasagjeri ishte mbret për shkak të çmimit të ulët po vdes.
Sot, udhëtari po shndërrohet në një burim të ardhurash që duhet të paguajë për çdo gjë, nga karburanti i shtrenjtë e deri te “shërbimi” që dikur ishte falas.
Nëse po prisni ofertat e minutës së fundit për korrikun apo gushtin, mund të mbeteni të zhgënjyer.
“Dritarja” e biletave të lira po mbyllet me shpejtësi këtë maj. Pas kësaj, fluturimi me kosto të ulët mund të jetë thjesht një nostalgji e të kaluarës. /skyweb.al
