Bashkia Himarë po rikthen në tryezë një nga projektet më të debatueshme të muajve të fundit.
Pavarësisht tërheqjes momentale të mëparshme dhe reagimeve publike, “Himara Invest” është futur sërish në rendin e ditës së mbledhjes së radhës së Këshillit Bashkiak, duke ngritur dyshime të forta për vazhdimin e një skeme që lidhet drejtpërdrejt me administrimin e pronave publike në bregdet.
Dokumenti i njoftimit për rendin e ditës së këshillit, tregon se në mbledhjen e datës 28 prill 2026, ndër pikat e rendit të ditës përfshihet edhe “krijimi i shoqërisë bashkiake ‘Himara Invest’ sh.p.k., në pronësi 100% të Bashkisë Himarë”.
Më herët, Skyweb.al raportoi për këtë nismë dhe për mënyrën e dyshimtë se si u miratua fillimisht në fund të janarit 2026.
Sipas dokumenteve të konsultuara, “Himara Invest” parashikohet të funksionojë si një strukturë që në praktikë do të administrojë pronat e bashkisë, me argumentin zyrtar të rritjes së eficiencës dhe performancës financiare të tyre.
Por mënyra se si është konceptuar kjo shoqëri ka ngritur pikëpyetje serioze.
Nga analizimi i dokumentacionit rezulton se kryetari i bashkisë, Vangjel Tavo, përqendron në duart e tij kompetenca të gjera vendimmarrëse, duke e vendosur veten në një pozicion që në praktikë ngjan me atë të një pronari mbi asetet publike.
Skema është e thjeshtë: Tavo urdhëron ngritjen e shoqërisë, Tavo kontrollon mënyrën e administrimit të pronave dhe Tavo ka ndikim në vendimmarrje.
Në këtë strukturë mbetet e paqartë se cili është mekanizmi real i kontrollit dhe para kujt jep llogari kjo shoqëri për mënyrën si menaxhohen asetet publike të Himarës.
Një tjetër element që bie në sy është nxitimi me të cilin është ndërtuar projekti.
Të paktën pesë dokumente mbajnë të njëjtën datë, 23 janar 2026, çka tregon një proces të përshpejtuar dhe të centralizuar vendimmarrjeje.
Sipas burimeve të brendshme pranë Këshillit Bashkiak, projekti mund të ketë një qëllim shumë më të gjerë se ai që paraqitet publikisht.
Burimi, i përfshirë në proceset vendimmarrëse të mazhorancës, pohon se “Himara Invest” synon të vendosë nën kontroll të plotë pronat e bashkisë dhe më pas të krijojë mundësinë për rishpërndarjen e tyre tek interesa të caktuara ekonomike.
Në praktikë, kjo mund të ndodhë në dy drejtime.
Së pari, përmes marrjes nën administrim të pronave që aktualisht janë dhënë me qira, me argumentin se tashmë do të menaxhohen nga shoqëria e re.
Pas një periudhe të shkurtër, këto prona do të rijepen te subjekte të tjera, potencialisht pranë drejtuesve vendorë apo grupeve të interesit.
Së dyti, përmes ndërhyrjes në pronat ku ekzistojnë konflikte pronësie mes bashkisë dhe privatëve.
Në këtë rast, “Himara Invest” do të shërbejë si instrument për të marrë kontrollin fillestar dhe më pas për të kaluar pronat në duar të treta, duke shmangur përplasjen direkte me komunitetin lokal.
Kjo situatë bëhet edhe më e ndjeshme duke pasur parasysh historinë e gjatë të konflikteve për pronat në Himarë.
Për vite me radhë, banorët janë përballur me mbivendosje pronësie, procese gjyqësore dhe raste ku persona të tretë janë shfaqur si pronarë të tokave me vlerë të lartë turistike.
Prandaj, çdo nismë që lidhet me administrimin e pronave publike kërkon transparencë maksimale.
Por rikthimi i “Himara Invest” në rendin e ditës, pa sqarime dhe pa përgjigje ndaj pyetjeve të ngritura nga media, vetëm sa shton dyshimet për një proces të mbyllur dhe të kontrolluar nga një rreth i ngushtë vendimmarrës.
Ky nuk është rasti i parë që vendimmarrjet e Bashkisë Himarë ngrenë diskutime.
Një nga episodet më të përfolura ishte dhënia e një tenderi për organizimin e aktiviteteve të sezonit turistik 2025 një kompanie nga Pogradeci që merret me tregtimin e patateve.
Tashmë, me rikthimin e “Himara Invest”, duket se Bashkia Himarë po hyn në një fazë të re, ku mënyra e menaxhimit të pronave publike mund të përcaktojë jo vetëm zhvillimin ekonomik të zonës, por edhe fatin e pronarëve lokalë. /skyweb.al
