Një alternativë më pak invazive ndaj operacionit të hapur të zemrës po fiton gjithnjë e më shumë popullaritet, por mjekët paralajmërojnë për kompromiset që ajo mund të sjellë, shkruan Wall Street Journal.
Procedura, e njohur si zëvendësimi i valvulës aortale përmes kateterit (TAVR), u jep pacientëve mundësinë të shmangin operacionin e rëndë ku hapet kraharori dhe ndalet zemra. Ajo ofron rikuperim më të shpejtë dhe më pak komplikime të menjëhershme.
Megjithatë, disa pacientë po përballen me probleme afatgjata. Në disa raste, valvulat e reja nuk funksionojnë aq mirë sa pritej ose nuk zgjasin aq gjatë sa alternativat tradicionale kirurgjikale.
Rasti i një pacienteje 64-vjeçare, e cila pas një procedure të tillë përjetoi sërish simptoma si marramendje dhe dhimbje të forta në krahë, ka ngritur shqetësime mbi efektivitetin afatgjatë të kësaj metode.
Ekspertët theksojnë se, megjithëse TAVR është një përparim i rëndësishëm në mjekësi, zgjedhja midis saj dhe operacionit tradicional duhet të bëhet me kujdes, duke marrë parasysh moshën, gjendjen shëndetësore dhe rreziqet individuale të çdo pacienti. /skyweb.al
