Në rrugët e vendit, një “sy” i ri po monitoron çdo lëvizje të drejtuesve të mjeteve. Kontrolli rrugor po vijon pa ndërprerje, edhe pa praninë fizike të policisë, falë përdorimit të teknologjisë së avancuar.
“Syri i teknologjisë” është tashmë i pranishëm në të gjitha akset kryesore dhe monitoron në kohë reale çdo shkelje të rregullave të qarkullimit. Përmes dronëve dhe sistemeve inteligjente, identifikohen shkelje si tejkalimi i shpejtësisë, drejtimi nën efektin e alkoolit, përdorimi i celularit gjatë drejtimit dhe parkimet e gabuara.
Paralelisht, Policia Rrugore ka intensifikuar kontrollet edhe në terren, duke përdorur radarë, dronë dhe mjete inteligjente, sidomos gjatë fundjavave dhe në akset drejt zonave turistike, ku fluksi i automjeteve është më i lartë.
Bilanci i javës së fundit tregon për një numër të lartë masash ndëshkuese. Janë vendosur 26 mijë e 116 masa administrative për shkelje të ndryshme, që nga mosvendosja e rripit të sigurimit, mospërdorimi i kaskës, përdorimi i celularit gjatë drejtimit, parakalimet e gabuara deri te drejtimi në gjendje të dehur.
Gjithashtu, janë arrestuar 48 drejtues mjetesh, prej të cilëve 26 për drejtim mjeti në gjendje të dehur dhe 22 pa leje drejtimi.
Në kryeqytet, kontrollet kanë sjellë edhe ndërhyrje për lirimin e hapësirave publike, ku janë zhvendosur 258 automjete të parkuara gabim, të cilat pengonin qarkullimin dhe lëvizjen e mjeteve të emergjencës.
Autoritetet theksojnë se përdorimi i teknologjisë dhe rritja e kontrolleve synojnë rritjen e sigurisë rrugore dhe uljen e numrit të aksidenteve në vend. /skyweb.al
