Ndonëse prej më shumë se katër vitesh rezulton i zhdukur, emri i Ervis Martinajt, ish-bosit të lojërave të fatit, vijon të mbetet në qendër të vëmendjes të mediave dhe hetimeve të autoriteteve shqiptare.
Pothuajse në çdo dosje ku përmendet aktiviteti i grupeve kriminale apo transaksione të dyshimta, emri i tij del sërish mes fashikujve hetimorë.
Së fundmi, weblajm ka raportuar se emri i Martinajt ka dalë në dosjen “ARUBA”.
Komunikimet e siguruara nga platforma e enkriptuar SkyECC kanë nxjerrë në pah edhe elementë të rinj që lidhen me aktivitetin e Martinajt, ku përmendet përfshirja e tij në “biznesin e betonit” që përdorej për ndërtimin e kullave në Tiranë.
Këto komunikime tashmë janë bërë pjesë e materialeve hetimore dhe po analizohen nga autoritetet, në kuadër të disa procedimeve që lidhen me krimin e organizuar dhe aktivitetet financiare të dyshuara.
Sipas bisedave të zhvilluara në qershor të vitit 2020 mes personave që tashmë janë shpallur në kërkim, i referohen atij me shprehjen: “Qenka punë Vis Martini“.
Kujtojmë se gjurmët e Ervis Martinaj humbën përfundimisht në zonën e Shijakut. Prej datës 10 Gusht 2022, kur raportohet se ka udhëtuar drejt këtij qyteti, Ervis Martinaj rezulton i zhdukur dhe për këtë fakt, familja ka bërë në të njëjtën datë kallëzim në Policinë e Lezhës.
Dosja u regjistrua për akuzën “Rrëmbim ose mbajtja peng e personit” kryer në formën e bashkëpunimit, por pas disa muajsh hetime, çështja nuk solli asgjë veç disa kontrolleve në shtëpitë e Astrit Avdylit, Jasin Avdylit dhe Aldo Avdylit.
Grupi i Shijakut, anëtar i të cilit është dhe Aldo Avdylaj, dyshohet se është i lidhur dhe me zhdukjen e biznesmenit të basteve Ervis Martinaj. Drejtuesit e tij janë marrë në pyetje nga Prokuroria, por mohuan të kenë pasur kontakte për të strehuar biznesmenin, sepse ishin në “Arrest shtëpie” dhe monitoroheshin nga Policia e Shtetit.
Ndërkohë që babai i Martinajt ka shkaur disa herë në SPAK ku dhe është shprehur : “Djali im është varë”. Për këtë arsye ai ka kërkuar shtetit që t’i gjejnë trupin dhe të vendosin drejtësi.
Ai është shprehur se në Prokurorinë e Kurbinit ka dorëzuar koordinata të sakta dhe emra konkretë personash që sipas tij mund të jenë të përfshirë në zhdukjen e Ervis Martinajt, por pavarësisht kësaj nuk është ndërmarrë asnjë veprim hetimor dhe çështja është lënë në harresë.
Sipas tij, drejtues të policisë kriminale ndër vite kanë qenë të interesuar që ngjarja të mos zbardhej. Martinaj ka deklaruar gjithashtu se të gjitha informacionet ia ka vënë në dispozicion edhe Prokurorisë së Posaçme, por që prej asaj kohe sipas tij askush nuk është interesuar më për ecurinë e hetimeve.
