Tregu i qirave afatshkurtra në Shqipëri po hyn në një fazë më të sofistikuar, ku mundësitë më të mëdha nuk qëndrojnë vetëm tek volumi, por tek segmentet e nën-shërbyera. Çmimet më të larta, që variojnë nga 100 deri në 180 apo 200 euro për natë për përvoja premium, po shfaqin potencial të madh për pritësit e rinj që synojnë një ofertë më cilësore dhe të diferencuar.
Në të njëjtën kohë, një tjetër “hapësirë e bardhë” po krijohet në segmentin e mesëm gjatë sezonit të ndërmjetëm. Pronat që ofrojnë ngrohje të mirë, ambiente të brendshme komode dhe pamje tërheqëse gjatë gjithë vitit mbeten ende të nën-përfaqësuara, duke krijuar terren për investime më të zgjuara.
Sipas një studimi të Investropa, karakteristikat që mund të bëjnë diferencën për pritësit e rinj përfshijnë izolimin dhe ngrohjen cilësore për përdorim jashtë sezonit, planimetri familjare me dy dhoma gjumi dhe parkim, si dhe dizajne autentike që dalin nga modelet standarde të apartamenteve. Veçanërisht të kërkuara mbeten përvojat tradicionale, si shtëpitë prej guri në Berat dhe Gjirokastër, që ofrojnë një identitet unik për turistët.
Kulmi i sezonit mbetet periudha korrik-gusht, kur zënia në zonat bregdetare mund të kalojë 85%. Në këtë periudhë, listimet më të suksesshme sidomos vilat me pamje nga deti në Ksamil apo Dhërmi mund të gjenerojnë të ardhura mujore nga 2,500 deri në 4,000 euro. Një vilë me dy dhoma gjumi, me çmim rreth 150 euro nata dhe me 80% zënie në korrik, mund të arrijë deri në 3,600 euro të ardhura në muaj.
Megjithatë, pjesa më e madhe e tregut mbetet më modeste. Rreth 80% e listimeve në Shqipëri gjenerojnë nga 500 deri në 1,800 euro në muaj, ku apartamentet në Tiranë renditen në segmentin më të ulët-mesatar, ndërsa vilat në Rivierë dominojnë gjatë verës. Në një treg që po piqet me shpejtësi, duket se suksesi nuk lidhet më vetëm me vendndodhjen, por me diferencimin nga komoditeti gjatë dimrit te eksperiencat autentike që turistët kërkojnë gjithnjë e më shumë./Scan
