Operacioni i përbashkët i SPAK me Antimafien e Barit për goditjen e një grupi kriminal të dyshuar për pastrim parash është shoqëruar edhe me sekuestrimin e pasurive të luajtshme dhe të paluajtshme, që dyshohet se burojnë nga aktiviteti kriminal.
Pasuritë e sekuestruara rezultojnë në emër të familjarëve dhe bashkëpunëtorëve të Igli Kamberit dhe Ergys Kastratit, të dy të arrestuar në kuadër të këtij operacioni.
Në total, autoritetet kanë sekuestruar 8 automjete, 10 llogari bankare, 4 shoqëri tregtare dhe 1 milion euro cash.
Sipas Zëri, pasuritë e vendosura nën sekuestro lidhen me Nevila Kamberin, bashkëshorten e Igli Kamberit, prindërit e saj Dituri dhe Fatos Buzi, bashkëshorten e Ergys Kastratit, Desmira Ceco, si edhe me persona të tjerë të dyshuar si bashkëpunëtorë apo përfitues nga aktiviteti kriminal i grupit. Mes tyre janë Bardhok Gjergji, Saimir Pirra, Sokol Fusha dhe Edi Brahaj.
Në pronësi të Igli Kamberit është sekuestruar subjekti “Igli Kamberi”, me veprimtari “Menzë, katering, restorante dhe shërbim ushqimor i lëvizshëm”, me seli në Kashar.
Në emër të bashkëshortes së tij, Nevila Kamberi, dhe nënës së saj, Dituri Buzi, janë sekuestruar 2 llogari bankare. Ndërsa babait të saj, Fatos Buzi, i është sekuestruar biznesi “Fermer Fatos Buzi”, me veprimtari “Bujqësi, prodhim fruta, perime”.
Një tjetër person i arrestuar në operacion është Ergys Kastrati. Në kuadër të hetimit, pasuri janë sekuestruar edhe në emër të bashkëshortes së tij, Desmira Ceco, së cilës i janë bllokuar 2 llogari bankare.
Pasuri të shumta janë sekuestruar edhe në emër të Bardhok Gjergjit.
Ende nuk është e qartë lidhja e tij me grupin kriminal, por ndaj tij është vendosur sekuestro mbi aktivitetin e biznesit “AUTO REND & SELL ALBANIA” sh.p.k., që merret me dhënie me qira automjetesh, shitblerje, import dhe eksport. Gjithashtu, Gjergjit i janë bllokuar 5 automjete luksoze dhe 1 llogari bankare.
Në sekuestro janë vendosur edhe pasuri të personave të tjerë, përfshirë llogari bankare dhe automjete në emër të Saimir Pirrës, Sokol Fushës dhe Edi Brahajt.
Këta persona dyshohet se kanë përfituar nga aktiviteti kriminal i grupit, ndërsa sekuestrimi i pasurive synon të godasë jo vetëm strukturën kriminale, por edhe produktin financiar të krijuar prej saj.
