Një rast i rëndë me pasoja potenciale për shëndetin publik është evidentuar në raportin e Kontrollit të Lartë të Shtetit, ku rezulton se mbi 2.5 ton salçiçe të kontaminuara “Wudy” nuk kanë asnjë gjurmë dokumentare për asgjësimin e tyre, duke ngritur dyshime serioze mbi mënyrën e menaxhimit të produkteve ushqimore në treg.
Sipas dokumentit të auditimit dhe burimeve të Ora News, bëhet fjalë për një sasi totale prej 8,852 kg produkte mishi të kontaminuara, të cilat duhej të asgjësoheshin sipas procedurave ligjore.
Megjithatë, në landfillin e autorizuar rezulton të jenë depozituar vetëm 6,280 kg, ndërsa diferenca prej 2,572.2 kg nuk figuron në asnjë dokument zyrtar.
Raporti e cilëson këtë si mungesë të plotë të gjurmueshmërisë, duke theksuar se nuk ka asnjë provë që kjo sasi është asgjësuar realisht. Në të njëjtën kohë, dokumenti nënvizon se nuk ekzistojnë të dhëna mbi metodën e asgjësimit, autorizimin institucional përkatës apo procedurat e ndjekura, duke e bërë të pamundur verifikimin e fatit të këtyre produkteve.
Sipas të dhënave të auditimit, produkti në fjalë është salçiçe “Wudy”, e kontaminuar me bakterin Listeria ST155, e importuar nga Italia dhe e tregtuar për konsum në popullatë në një sasi që arrin në 328,829 kg. Kjo e zgjeron ndjeshëm përmasën e problemit dhe rrit rrezikun potencial për konsumatorët.
Burime mediatike e lidhin këtë rast me subjektin “SPAR Albania”, i cili sipas këtyre burimeve kishte detyrimin për menaxhimin dhe asgjësimin e produkteve të kontaminuara. Megjithatë, në raportin zyrtar të KLSH subjekti përmendet i anonimizuar si “Shoqëria S A”, pa u identifikuar publikisht.
Auditimi evidenton gjithashtu një tjetër problem serioz: mungesën e dokumentacionit për dezinfektimin e ambienteve ku janë mbajtur produktet e kontaminuara. Nuk ka prova për pastrimin, trajtimin apo analizat që konfirmojnë eliminimin e ndotjes, çka shton rrezikun për përhapjen e kontaminimit në produkte të tjera ushqimore.
Në të njëjtën kohë, raporti konstaton se Autoriteti Kombëtar i Ushqimit nuk ka komunikuar me Ministrinë e Shëndetësisë për rrezikun që paraqesin këto produkte, pavarësisht faktit se bëhet fjalë për një bakter të rrezikshëm për shëndetin publik.
KLSH e konsideron këtë situatë si shkelje të rëndë të ligjit “Për ushqimin” dhe kërkon nisjen e një hetimi administrativ për të përcaktuar përgjegjësit dhe për të verifikuar nëse kjo sasi është rikthyer në treg.
Mungesa e gjurmueshmërisë për një sasi kaq të madhe produktesh të kontaminuara lë të hapur skenarin më shqetësues: që këto produkte mund të kenë dalë jashtë çdo kontrolli institucional dhe potencialisht të jenë konsumuar nga qytetarët.
Ky rast rikthen në qendër të vëmendjes dobësitë në sistemin e sigurisë ushqimore në vend dhe ngre pikëpyetje të forta mbi kontrollin real të zinxhirit nga importi deri te asgjësimi i produkteve të rrezikshme. /skyweb.al
