Nuset që përdorin medikamente për humbje peshe si GLP-1 po ndryshojnë jo vetëm trupin e tyre, por edhe mënyrën se si funksionon industria e fustaneve të nusërisë. Sipas një raportimi të The Wall Street Journal, disa studio nusërie në Shtetet e Bashkuara kanë nisur t’u kërkojnë klienteve të firmosin dokumente ligjore, për të shmangur mosmarrëveshjet në rast se pesha e tyre ndryshon ndjeshëm para dasmës.
Fenomeni lidhet me popullaritetin në rritje të barnave GLP-1, si Ozempic dhe Wegovy, të cilat kanë transformuar procesin tradicional të provave të fustaneve. Humbja e shpejtë në peshë mund të bëjë që një fustan i porositur muaj më parë të mos përshtatet më në ditën e ceremonisë.
Një nga rastet e përmendura është ai i Nicole Hamilton nga Nju Jorku, e cila ka humbur rreth 50 kg falë këtyre medikamenteve dhe vijon ende procesin e dobësimit, edhe pse dasma po afron. Për këtë arsye, ajo ka kërkuar që fustani i saj të qepet me një bel më të ngushtë sesa përmasat aktuale.
Pronaret e salloneve të nusërisë thonë se po përballen gjithnjë e më shpesh me kliente që vazhdojnë të humbin peshë pas porosisë së fustanit. Kjo ka sjellë sfida të reja në matje, qepje dhe përshtatje, ndërsa kostot e modifikimeve mund të rriten ndjeshëm.
Për të shmangur konfliktet, disa dyqane kanë futur klauzola të posaçme në kontrata, ku klientet pranojnë se ndryshimet e mëdha në peshë mund të kërkojnë pagesa shtesë ose, në raste ekstreme, edhe blerjen e një fustani të ri.
Ekspertët e modës theksojnë se, megjithëse teknologjia dhe mjekësia po ndryshojnë trupat e nuseve, një gjë mbetet e pandryshuar: gjetja e fustanit perfekt vazhdon të jetë një nga momentet më emocionuese dhe më stresuese të organizimit të dasmës. /skyweb al
