Një ndryshim i rëndësishëm në funksionimin e pikës kufitare të Qafë Botës ka hyrë në fuqi duke nisur nga mëngjesi i kësaj të diele, 11 maj, duke sjellë lehtësim për qytetarët që udhëtojnë mes Shqipërisë dhe Greqisë.
Dogana greke e Mavromatit, në Pikën e Kalimit Kufitar Qafë Botë, ka njoftuar zyrtarisht zgjatjen e orarit të punës për kalimin e qytetarëve dhe automjeteve.
Sipas njoftimit, pika kufitare do të funksionojë çdo ditë nga ora 05:00 deri në 23:00 me orën shqiptare, ose nga ora 06:00 deri në 24:00 me orën greke.
Zgjatja e orarit pritet të ndikojë drejtpërdrejt në lehtësimin e fluksit të lëvizjes, veçanërisht për banorët e jugut të vendit, emigrantët dhe turistët që përdorin këtë pikë kalimi gjatë sezonit veror.
Po ashtu, autoritetet presin që ndryshimi të ndihmojë edhe në reduktimin e radhëve dhe përmirësimin e qarkullimit gjatë orëve të pikut, kur numri i udhëtarëve rritet ndjeshëm, sidomos në fundjava dhe festa. /skyweb.al
