Administrata Tatimore ka nisur pagesat për qytetarët që rezultojnë me tatim të mbipaguar nga deklarimi i të ardhurave personale përmes DIVA 2025, duke kthyer për herë të parë në praktikë mekanizmin e rimbursimit për individët deklarues.
Sipas njoftimit zyrtar të Drejtorisë së Përgjithshme të Tatimeve, deri tani kanë përfituar 3091 individë, të cilët janë konsideruar “pa risk” nga administrata tatimore. Vlera totale e tatimit të rimbursuar arrin në 52.8 milionë lekë.
Tatimet e cilësojnë këtë proces si një lehtësi fiskale që po aplikohet për herë të parë nëpërmjet deklarimit DIVA 2025, duke krijuar mundësi për qytetarët që të përfitojnë nga deklarimi korrekt i të ardhurave të tyre.
Sipas institucionit, skema synon jo vetëm kthimin e shumave të mbipaguara, por edhe nxitjen e formalizimit dhe rritjen e besimit te deklarimi individual i të ardhurave.
Në njoftim theksohet se procesi po kryhet për individët që janë verifikuar si subjekte pa elementë risku, ndërsa Administrata Tatimore deklaron se puna do të vijojë për një sistem më transparent dhe më pranë qytetarëve.
