Humbjet e energjisë elektrike në rrjetin e shpërndarjes ranë në 15.91% gjatë gjashtë muajve të parë të vitit 2026.
Ky nivel është 1.1% më i ulët krahasuar me të njëjtën periudhë të vitit të kaluar dhe qëndron poshtë objektivit të vendosur për këtë vit, prej 16.5%.
Megjithatë, rezultati përfundimtar do të vlerësohet në mbyllje të vitit, pasi sasia e energjisë së humbur ndryshon në periudha të ndryshme, në varësi edhe të konsumit.
Sipas të dhënave të publikuara nga Enti Rregullator i Energjisë, gjatë periudhës janar–qershor, në rrjetin e Operatorit të Sistemit të Shpërndarjes humbën rreth 716 mijë MWh energji.
Pjesa më e madhe e këtyre humbjeve, rreth 76%, u klasifikua si humbje teknike.
Ndërkohë, humbjet joteknike arritën në rreth 171 mijë MWh, ose gati 24% të totalit.
Humbjet teknike lidhen kryesisht me amortizimin e rrjetit elektrik. Ato përbëjnë pjesën më të madhe të energjisë së humbur dhe reduktimi i tyre kërkon investime në infrastrukturën e shpërndarjes.
Pjesa tjetër përfshin humbjet joteknike, të cilat lidhen me abuzimet dhe vjedhjet e energjisë elektrike.
Për uljen e këtij treguesi, ndërmerren kontrolle ndaj subjekteve të ndryshme në vend, me synim evidentimin dhe ndëshkimin e rasteve të abuzimit me energjinë.
Reduktimi i humbjeve konsiderohet një tregues i rëndësishëm i performancës së operatorit, pasi energjia që humbet përbën kosto për të gjithë sistemin.
Niveli prej 15.91% i regjistruar në gjashtëmujorin e parë tregon se objektivi vjetor prej 16.5% është aktualisht i përmbushur.
Megjithatë, mbetet për t’u parë nëse ky rezultat do të ruhet deri në fund të vitit, kur do të llogaritet niveli përfundimtar i humbjeve në rrjetin e shpërndarjes. /skyweb.al
