Tatimpaguesit kanë kursyer 104.3 milionë euro kosto fiskale nga procesi i rivlerësimit të pasurive të paluajtshme gjatë periudhës mars-qershor 2026.
Shifra është bërë publike nga Drejtoria e Përgjithshme e Tatimeve, e cila njofton se rivlerësimi u ka mundësuar individëve dhe bizneseve të përfitojnë nga tarifat e reduktuara të parashikuara në ligj.
Sipas DPT-së, lehtësia fiskale ka ulur ndjeshëm koston që qytetarët dhe bizneset do të paguanin në rast të transferimit të pronës.
“104.3 milionë euro kosto fiskale e kursyer nga tatimpaguesit gjatë periudhës mars-qershor 2026, falë rivlerësimit të pasurive të paluajtshme”, thuhet në njoftimin e Tatimeve.
Rivlerësimi i pronave u jep mundësi pronarëve të përditësojnë vlerën e pasurisë së paluajtshme, duke paguar një tatim më të reduktuar krahasuar me barrën fiskale që do të aplikohej në rast shitjeje apo transferimi pa rivlerësim.
Administrata Tatimore u bën apel individëve dhe bizneseve që të përfitojnë nga ky proces brenda afatit ligjor.
Afati për rivlerësimin e pasurive të paluajtshme përfundon më 31 dhjetor 2026.
“Rivlerësoni pronën tuaj brenda afatit dhe përfitoni nga lehtësitë fiskale të parashikuara në ligj”, apelon DPT.
