Një pallat në rrugën “Llukë Kaçaj” në Tiranë është konfiskuar për interes publik, pas verifikimeve që zbuluan tejkalim të lejes së ndërtimit dhe përdorim të godinës pa certifikatë përdorimi.
Aksioni u zhvillua nga Policia e Shtetit dhe Inspektorati i Mbrojtjes së Territorit i Bashkisë Tiranë, përmes Drejtorisë së Monitorimit dhe Zbatueshmërisë së Lejeve të Ndërtimit, në kuadër të zbatimit të ligjit për kontrollin e territorit.
Sipas autoriteteve, gjatë kontrolleve rezultoi se në objektin 9-katësh ishin ndërtuar në kundërshtim me lejen kati i 10 dhe i 11, si edhe një pjesë e katit të 12. Po ashtu, godina ishte vënë në përdorim pa u pajisur me certifikatë përdorimi.
Referuar Aktit Normativ Nr.8, datë 1 tetor 2025, tejkalimi i konstatuar rezultoi mbi pragun ligjor prej 10 për qind, çka sipas ligjit sjell masën e konfiskimit për interes publik.
Materialet procedurale janë referuar në Prokurori për veprime të mëtejshme, ndërsa Policia bëri të ditur se specialistët e Hetimit të Krimeve Ekonomiko-Financiare dhe Komisariati Nr.4 në Tiranë kishin referuar edhe më herët materiale procedurale për shkelje të konstatuara në këtë objekt.
Policia e Shtetit deklaroi se do të vijojë bashkëpunimin me institucionet përgjegjëse për kontrollin e territorit, me fokus goditjen e ndërtimeve të paligjshme dhe shkeljeve kundër mjedisit. /skyweb.al
