Kostoja e lartë po pengon mijëra shqiptarë të marrin kujdesin shëndetësor për të cilin kanë nevojë. Sipas Eurostatit, 8% e popullsisë mbi 16 vjeç nuk kreu një ekzaminim të nevojshëm gjatë vitit 2024, sepse nuk mund ta përballonte financiarisht.
Ky është niveli i dytë më i lartë në Europë, pas Greqisë, ku treguesi arriti në 8.8% në vitin 2025, raporton Monitor.
Mesatarja e Bashkimit Europian ishte vetëm 1%, ndërsa përqindja arrinte në 2.5% në Letoni, 2% në Rumani, 1.9% në Francë dhe 1.6% në Itali.
Në Shqipëri, kostoja rezulton pengesa kryesore, por jo e vetmja. Rreth 1.5% e qytetarëve nuk e morën shërbimin për shkak të listave të pritjes dhe 0.2% për shkak të largësisë.
Të tria pengesat prekën së bashku 9.8% të popullsisë, kundrejt vetëm 2.4% në BE.
Një tjetër 2% e shqiptarëve zgjodhi të priste nëse problemi shëndetësor do të kalonte vetë, ndërsa 1.8% deklaroi se nuk kishte pasur kohë për ekzaminimin.
Frika nga mjeku, spitali ose trajtimi pengoi 0.2% të popullsisë, ndërsa 0.1% deklaroi se nuk njihte një specialist të përshtatshëm.
Në total, 14.9% e shqiptarëve raportuan të paktën një nevojë të paplotësuar për ekzaminim mjekësor.
Shqipëria paraqitet shumë më keq edhe krahasuar me rajonin. Kostoja pengoi vetëm 1.2% të qytetarëve në Maqedoninë e Veriut, 1.1% në Serbi dhe 0.3% në Malin e Zi.
Situata lidhet edhe me financimin e ulët të shëndetësisë dhe barrën e lartë që bie mbi familjet.
Konsumi për shëndetësinë në Shqipëri ishte 662 euro për banor në vitin 2025, kundrejt 3,675 eurove në BE.
Sipas Bankës Botërore, familjet shqiptare paguanin drejtpërdrejt nga xhepi 48.27% të shpenzimeve shëndetësore në vitin 2023, niveli më i lartë në Europë.
Të dhënat e Eurostatit bazohen në vlerësimin e qytetarëve nëse kishin nevojë për ekzaminim apo kujdes mjekësor, por nuk e morën atë. Për Shqipërinë, të dhënat më të fundit janë të vitit 2024, ndërsa për BE-në dhe shumicën e vendeve europiane krahasimi i referohet vitit 2025.
