Agjencia e Inteligjencës Financiare ka evidentuar një tjetër skemë të dyshuar të pastrimit të parave, ku një person me precedentë penalë në fushën e narkotikëve dyshohet se ka përdorur depozitime bankare dhe transferta nga persona të tretë për të blerë pasuri të paluajtshme jashtë vendit.
Rasti është përfshirë në Raportin Vjetor 2025 të AIF, në tipologjitë e rasteve të dërguara për hetim në organet ligjzbatuese. Sipas raportit, Shtetasi A kishte kryer disa depozitime në llogarinë e tij bankare, në vlerën totale prej 50 mijë eurosh, të deklaruara si të ardhura nga kursime.
Por këto nuk ishin fondet e vetme që kishin hyrë në llogari. I njëjti person kishte përfituar edhe transferta nga persona të tretë, të paraqitura si hua ose dhurata, në vlerën totale prej 75 mijë eurosh. Nga verifikimet e kryera për këta persona, AIF konstatoi se ata nuk kishin marrëdhënie familjare me shtetasin A.
Ky është një nga elementët që ka ngritur dyshime, pasi përdorimi i huave apo dhuratave nga persona pa lidhje të qarta mund të shërbejë si mënyrë për të maskuar burimin real të parave. Në këtë rast, fondet e grumbulluara në llogari më pas janë përdorur për një transaksion jashtë vendit.
Sipas raportit, nga analiza e lëvizjeve financiare rezultoi se Shtetasi A kishte transferuar 120 mijë euro në llogarinë e Shtetasit B, në një vend europian, me qëllim blerjen e një pasurie të paluajtshme.
Pjesa më e rëndë e rastit lidhet me të kaluarën e personit të përfshirë. Nga verifikimet e mëtejshme rezultoi se Shtetasi A kishte ndryshuar gjeneralitetet dhe evidentohej si person me precedent penal në fushën e narkotikëve.
AIF ka marrë në konsideratë dy anomali kryesore: dhënien e huave apo dhuratave nga palë të treta pa lidhje të evidentuara mes tyre dhe transferimin e fondeve jashtë vendit për blerje pasurie të paluajtshme. Për këto arsye, rasti është dërguar për investigim të mëtejshëm në organet ligjzbatuese.
Më pas, AIF është informuar se rasti është referuar në Prokurori për veprat penale të fshehjes së të ardhurave dhe pastrimit të produkteve të veprës penale ose veprimtarisë kriminale.
Rasti tregon një tjetër mënyrë se si fondet me burim të paqartë mund të kanalizohen përmes sistemit bankar, duke u paraqitur fillimisht si kursime, hua apo dhurata, e më pas duke u transferuar jashtë vendit për blerje pronash. Në këtë rast, dyshimet rëndohen edhe më shumë për shkak të precedentëve penalë në fushën e narkotikëve dhe ndryshimit të gjeneraliteteve nga personi i përfshirë. /skyweb.al
