Pamje të publikuara nga kontrolli i ushtruar në jahtin e Bruno Çelës tregojnë efektivë të Policisë duke lëvizur këmbëzbathur në ambientet e mjetit lundrues, në dukje për të mos dëmtuar apo ndotur sipërfaqet e brendshme të tij.
View this post on Instagram
Kontrolli është kryer pasi jahti u ndalua dhe u ankorua në breg, pas ngjarjes së ndodhur në zonën e Palasës, ku dyshohet se është qëlluar me armë zjarri në drejtim të mjetit lundrues.
Sipas policisë, në bord ndodheshin Bruno Çela, Afrim Kastrati, Leandro Haso dhe Pashk Gjini. Personat janë shoqëruar dhe janë marrë në pyetje lidhur me rrethanat e ngjarjes.
Pas daljes së tyre në breg, efektivët kanë kontrolluar ambientet e jahtit. Policia tha se gjatë kontrollit nuk janë gjetur armë apo sende të tjera të paligjshme.
Ndërkohë, nga pamjet dhe informacionet e siguruara mësohet se një prej personave që ndodheshin në jaht ka tentuar të largohej me not, por më pas është rikthyer te mjeti lundrues.
Ndërkohë, në momentin kur jahti ankorohet dhe policia pret në breg, Bruno Çela shfaqet i lagur dhe duke u fshirë me peshqir. (shih videon e publikuar nga faqja Disidentët)
Identiteti i personit që ka hyrë në ujë nuk është konfirmuar zyrtarisht nga Policia.
Bruno Çela rezulton i përfshirë në disa aktivitete biznesi. Përveç lidhjeve me kompaninë “Brunes”, ai figuron aksioner në shoqërinë e mjeteve lundruese “MennYacht Albania”, si edhe në kompanitë “AKBC Invest” dhe “BB Orikum Invest”, të fokusuara në ndërtimin dhe menaxhimin e strukturave turistike.
Hetimet vijojnë për të përcaktuar dinamikën e plotë të ngjarjes, origjinën e të shtënave dhe veprimet e personave që ndodheshin në bord.
View this post on Instagram
