“Nuk kam ndjerë gjë më të rëndë se kriminalizimi i jetës sime”, deklaroi ish-drejtoresha e AKSHI-t, Mirlinda Karçanaj, në një intervistë për Top Channel, ku foli për pasuritë, sekuestrimet dhe jetën e saj personale.
Karçanaj deklaroi se aktualisht jeton në një apartament me qira, të marrë pranë vendit të punës pasi, sipas saj, nuk drejton automjet.
“Jetoj në një shtëpi me qira. Deri në vitin 2024 kam jetuar në apartamentin ku kam lindur. Apartamentin ku jetoj me qira e kam marrë me kontratë dhe e kam zgjedhur afër punës, sepse nuk drejtoj makinë dhe nuk kam makinë”, tha ajo.
Ish-drejtoresha e AKSHI-t reagoi edhe për pasuritë e sekuestruara, duke theksuar se sekuestrimi nuk do të thotë automatikisht se një pronë është e paligjshme.
“Një pasuri e sekuestruar nuk është e paligjshme. Por dua të shtoj se nuk mund të provoj ndjesi më të keqe se kriminalizimi i jetës sime”, deklaroi Karçanaj.
Ajo tha se pasuritë e saj janë ndërtuar ndër vite me punë dhe sakrifica, duke kujtuar edhe periudhën e emigrimit në Kanada.
“Ato janë orenditë dhe muret e ndërtuara me dinjitet. Kam 30 vjet që punoj. Kam emigruar në Kanada, kam dalë nga shtëpia në 7 të mëngjesit dhe kthehesha në 8 të darkës”, u shpreh ajo.
Deklaratat e Karçanajt rikthyen sërish në vëmendje edhe mbrojtjen publike që i bëri më herët kryeministri Edi Rama, i cili deklaroi se ajo jetonte në një shtëpi me qira dhe kishte jetuar më parë në apartamentin e prindërve.
Megjithatë, një verifikimi i pasurisë, bazuar në deklaratat pasurore pranë ILDKPI-së, arriti në përfundimin se Karçanaj zotëron katër apartamente dhe një ullishte 1,500 m², ku dy prona rezultojnë në bashkëpronësi me bashkëshortin dhe dy të tjera në pronësi të plotë.
Sipas analizës së deklaratave pasurore ndër vite, Karçanaj ka deklaruar fillimisht bashkëpronësi në një apartament 3+1 në Tiranë, më pas blerjen e një apartamenti tjetër 136 m² në Tiranë dhe një apartamenti 60 m² në Qerret, ndërsa në vitin 2022 rezulton të ketë përfituar edhe prona të tjera përmes trashëgimisë.
Ndërkohë, në dosjen hetimore të SPAK është përfshirë edhe një tjetër episod që lidhet me një apartament duplex në kompleksin “Laguna Blu” në Qerret, për të cilin prokuroria dyshon se përdorej realisht nga Karçanaj, ndërsa ishte regjistruar në emër të personave të tjerë.
Sipas SPAK, prona dyshohet të jetë mbajtur formalisht në emër të shtetasit Ram Basha dhe më herët të një punonjëseje të kompanisë Soft & Solution, ndërsa hetuesit pretendojnë se është përdorur nga Karçanaj.
Në dëshminë e tij, Ram Basha deklaron se nuk kishte qenë kurrë në Qerret dhe se nuk mbante mend rrethanat e blerjes së pronës, ndërsa SPAK dyshon se është përdorur si prestanome në një skemë të organizuar të fshehjes së pasurive.
Po ashtu, hetuesit kanë përmendur edhe pagesa mirëmbajtjeje të kryera nga shoferi i Karçanajt, Florian Bylyku, si dhe deklarime të punonjësve të lidhur me kompaninë Soft & Solution të Ermal Beqiri.
Karçanaj ndodhet aktualisht në masë sigurie “arrest shtëpie” dhe hetohet nga SPAK për “Shkelje të barazisë së pjesëmarrësve në tendera”, “Grup të strukturuar kriminal” dhe “Kryerje të veprave penale nga organizata kriminale”. /skyweb.al
