Ish-drejtoresha e AKSHI-t, Mirlinda Karçanaj, ka komentuar publikisht akuzat që rëndojnë ndaj saj, duke deklaruar se gjithmonë ka pasur admirim për SPAK-un dhe profesionin e prokurorit, por duke lënë të kuptohet se klima mediatike ka ndikuar në perceptimin publik të çështjes.
Në një intervistë për Top Channel, Karçanaj tha se beson që procesi ndaj saj do të gjykohet mbi prova dhe dokumente dhe jo mbi “video të nxjerra jashtë kontekstit”.
“Unë kam respekt për punën e profesionistëve dhe të prokurorëve, madje para se të më kthehej bota përmbys. E kam parë SPAK-un me admirim, ndonëse e kam në kurriz si në ëndrrën time më të keqe”, deklaroi ajo.
Karçanaj po hetohet për veprat penale “Shkelje e barazisë së pjesëmarrësve në tendera apo ankande publike”, kryer në formën e grupit të strukturuar kriminal, si edhe për “Grup i strukturuar kriminal” dhe “Kryerje të veprave penale nga organizata kriminale dhe grupi i strukturuar kriminal”.
SPAK sekuestron pasuritë milionëshe të Agasit dhe Beqirit, goditet edhe Mirlinda Karçanaj
Në deklaratat e saj, ish-drejtoresha e AKSHI-t u ndal edhe te videot e publikuara në media, për të cilat tha se janë interpretuar jashtë kontekstit.
Pikërisht këto pamje janë bërë objekt i debatit publik në muajt e fundit, ku në disa prej tyre shfaqet Ergys Agasi duke iu drejtuar Karçanajt me shprehjen “ti zemra”, ndërsa në materiale të tjera të publikuara në media përmenden diskutime mes Agasit, Karçanajt dhe Ermal Beqiri lidhur me mënyrën se si do të përcaktohej fituesi i një tenderi.
FAKTET/ Mirlinda Karçanaj ka 4 apartamente dhe nuk jeton me qira siç tha Rama
“Nuk besoj se prokurorët dhe gjyqtarët do të jenë të padrejtë me mua pasi të më pyesin dhe të hetojnë provat dhe dokumentat, dhe jo me video të nxjerra nga konteksti”, tha Karçanaj.
Ajo sugjeroi gjithashtu se mënyra si është trajtuar çështja në media ka ndikuar në krijimin e një perceptimi negativ ndaj saj, duke lënë të kuptohet se raportimet publike kanë shtuar presionin dhe paragjykimin mbi hetimin. /skyweb.al
