Pasagjerët pritet të paguajnë më shumë për fluturimet gjatë muajve në vijim, pasi kostot e larta të energjisë dhe karburantit po ushtrojnë presion të fortë mbi linjat ajrore.
Drejtori i përgjithshëm i Shoqatës Ndërkombëtare të Transportit Ajror, IATA, Willie Walsh, paralajmëroi se rritja e çmimeve të biletave është tashmë e pashmangshme, pasi kompanitë ajrore nuk mund të vazhdojnë të mbulojnë për një kohë të gjatë kostot shtesë të karburantit.
“Nuk ka asnjë mënyrë që linjat ajrore të vazhdojnë të përballojnë kostot shtesë me të cilat po përballen”, tha Walsh, duke shtuar se disa kompani mund të ofrojnë ulje të përkohshme për të stimuluar kërkesën, por në fund çmimet e larta të naftës do të reflektohen te çmimi i biletave.
Situata është rënduar edhe nga problemet e tranzitit në Ngushticën e Hormuzit, një prej pikave më të rëndësishme për transportin global të naftës dhe karburanteve. Varësia e Evropës nga importet e karburantit nga Lindja e Mesme ka shtuar shqetësimet për furnizimin gjatë sezonit veror, kur kërkesa për fluturime arrin kulmin.
Industria e aviacionit është ndër sektorët më të ekspozuar ndaj luhatjeve të çmimeve të naftës. Karburanti i avionëve arriti mbi 200 dollarë për fuçi në prill, përpara se të ulej në rreth 150 dollarë këtë muaj. Pavarësisht rënies, niveli mbetet i lartë dhe po ndikon drejtpërdrejt në kostot operative të kompanive.
Përballë kësaj situate, disa linja ajrore kanë nisur të anulojnë fluturime më pak fitimprurëse, ndërsa trafiku global i pasagjerëve mbetet ende nën nivelet normale. Kjo e bën më të vështirë për kompanitë që të shpërndajnë kostot në një volum më të madh udhëtarësh.
Ndërkohë, Komisioni Evropian ka ndërhyrë për të mbrojtur pasagjerët nga ndryshimet e njëanshme të çmimeve pas blerjes së biletës. Në një direktivë të publikuar më 8 maj, Brukseli sqaroi se linjat ajrore nuk mund të vendosin tarifa shtesë për karburantin pasi bileta të jetë blerë.
Komisioni theksoi se çdo ndryshim prapaveprues në çmimin përfundimtar të biletës ajrore është i përjashtuar, duke kujtuar se rregullat e Bashkimit Evropian kërkojnë transparencë të plotë për koston finale që paguan pasagjeri.
Kjo do të thotë se kompanitë mund të rrisin çmimet për biletat e reja, por nuk mund t’u kërkojnë pasagjerëve pagesë shtesë për karburantin pasi ata kanë përfunduar blerjen.
