Gjatë tremujorit të parë të këtij viti, paga mesatare mujore bruto për një të punësuar me pagë në Shqipëri arriti në 82.210 lekë (840 euro), duke shënuar një rritje prej 11,6 për qind krahasuar me të njëjtën periudhë të vitit të kaluar.
Të dhënat e publikuara nga INSTAT tregojnë se ky është një nga ritmet më të larta vjetore të rritjes së pagës mesatare, por edhe një pasqyrë e qartë e diferencave të theksuara midis sektorit publik dhe atij privat, raporton Skyweb.al.
Sektori publik është përfituesi më i madh i kësaj rritjeje. Paga në administratën publike, në institucionet arsimore dhe ato të shëndetësisë, si dhe në aktivitetet e sigurimeve shoqërore dhe të ndihmës sociale, u rrit me 16,7 për qind në krahasim me tremujorin e parë të 2024-ës.
Kjo rritje i ka dhënë një hov të ndjeshëm pagesës së punonjësve të shtetit, duke bërë që diferenca me sektorin privat të zgjerohet edhe më shumë.
Nga ana tjetër, aktivitetet ekonomike që raportuan paga mesatare më të larta se mesatarja kombëtare ishin ato të sektorit financiar dhe të sigurimeve, si edhe informacioni dhe komunikacioni. Në këto fusha, pagat tradicionisht kanë qenë më të larta, për shkak të nivelit të lartë të specializimit dhe kërkesës në treg për këto profesione.
Në aspektin profesional, më të paguarit rezultojnë të jenë menaxherët, ligjvënësit dhe drejtorët ekzekutivë, si dhe specialistët me arsim të lartë. Këto kategori profesionistësh mbeten konstant në krye të listës, për shkak të përgjegjësive të larta dhe nivelit të kualifikimit që kërkojnë pozicionet e tyre.
Rritja më e madhe e pagës, krahasuar me një vit më parë, u regjistrua tek forcat e armatosura, me një rritje prej 23,1 për qind. Pas tyre vijnë specialistët me arsim të lartë, të cilët përfituan një rritje prej 13,7 për qind. Këto shifra tregojnë një orientim të qartë të politikave publike për të stimuluar profesionet e specializuara dhe strukturat shtetërore.
Në të kundërt, sektorët që përjetuan rritjet më të vogla ishin industria, me vetëm 5,2 për qind, dhe bujqësia, pyjet e peshkimi me 5,3 për qind. Këto shifra tregojnë jo vetëm një ecuri më të ngadaltë të pagave në ekonominë reale, por edhe një diferencim të qartë në mbështetjen institucionale që marrin sektorë të caktuar.
Në këtë panoramë të shpërndarjes së pagave, duket se “të jesh në administratë” jo vetëm që siguron një punë të qëndrueshme, por gjithnjë e më tepër edhe një rrogë mbi mesataren kombëtare. Dhe kjo e bën më aktuale se kurrë shprehjen ironike që vjen gjithnjë nga goja e qytetarëve: “Oh sa mirë me qenë administratë!”. /skyweb.al
