Pa kaluar ende një vit nga miratimi i reformës së fundit të pagave, qeveria ka vendosur të ndërhyjë sërish me një paketë të re shtesash dhe ndryshimesh për disa kategori funksionarësh në administratën shtetërore. Këshilli i Ministrave ka aprovuar vendimin e ri që prek zëvendësministrat, funksionarët e kabineteve, prefektët, nënprefektët, nëpunësit civilë si dhe punonjës të disa institucioneve të tjera të administratës publike.
Sipas vendimit të miratuar me propozim të zëvendëskryeministrit, ndryshimet kanë për qëllim përditësimin dhe përshtatjen e strukturës aktuale të pagave me nevojat e funksionimit të administratës. Në këtë kuadër, tabelat ekzistuese të kategorizimit të pagave zëvendësohen me tabela të reja, që ridimensionojnë dhe saktësojnë pozicionet përkatëse brenda institucioneve.
Një ndër ndryshimet kryesore parashikon shtesa të konsiderueshme për pozicionet drejtuese të administratës qendrore. Konkretisht, për pozicionet e “Sekretarit të Përgjithshëm” dhe “Zëvendëssekretarit të Përgjithshëm” është miratuar një shtesë mujore prej 65 mijë lekësh. Gjithashtu, është bërë një riformulim i pozitës së “Koordinatorit”, duke e përcaktuar më qartë pozicionin e tij brenda njësive të menaxhimit që funksionojnë pranë Sekretarëve të Përgjithshëm.
Financimi i këtyre ndryshimeve për vitin 2025 do të mbulohet nga buxheti i miratuar për Kryeministrinë. Efektet financiare do të hyjnë në fuqi me emërimet përkatëse në pozicionet e përfshira në vendim.
Rritja e pagave ka qenë një nga zotimet kryesore të Kryeministrit Edi Rama gjatë fushatës së fundit elektorale. Ai ka theksuar se objektivi i qeverisë është jo vetëm përmirësimi i kushteve të administratës publike, por edhe nxitja e rritjes së pagave në sektorin privat. “Kur shteti rrit pagat, sektori privat ndjek mbrapa. Ne kemi arritur që për disa nivele të jemi konkurrues edhe me bankat, pasi kemi nevojë për njerëz të kualifikuar, sidomos për procesin e negociatave”, deklaroi Rama në një takim me mësues, në muajin mars.
Sipas projeksioneve të qeverisë, paga mesatare në sektorin publik dhe privat së bashku pritet të arrijë nivelin e 1 mijë eurove në muaj. Po ashtu, Kryeministri ka përsëritur angazhimin për ta çuar pagën minimale në 500 euro brenda mandatit aktual qeverisës, duke parashikuar edhe lehtësime fiskale për sipërmarrësit për të mbështetur këtë objektiv.
