Ndërtimet e reja janë zëri kryesor që furnizojnë me të ardhura bashkitë në vend. Referuar të dhënave zyrtare të Ministrisë së Financave mbi performancën e njësive të vetëqeverisjes vendore, rezulton se rritja më e madhe e të ardhurave është nga taksat lokale, kryesisht të ardhurat nga ‘taksa e ndikimit në infrastrukturë nga ndërtimet e reja’, e cila në gjysmën e parë të vitit 2026, krahasuar me të njëjtën periudhë të 2025 ka një rritje prej 12.2 miliardë lekë, ku konkretisht vërehet një rritje e arkëtimeve të kësaj takse kryesisht në bashkinë Tiranë si dhe bashkitë ku ka ndërtime të reja në zhvillim.
7 bashki në vend kryesojnë sa i takon rritjes së të ardhurave nga ky zë, duke filluar nga Bashkia Tiranë e cila ka arkëtuar 12.4 miliardë lekë, me një kapërcim prej 9.8 miliardë lekësh në raport me 6 mujorin 2025, ndjekur nga bashkia Himarë, me 1.2 miliardë lekë të ardhura në 6 muaj, dhe më pas renditet bashkia Sarandë, Durrës, Shkodër, Lezhë dhe Kavajë. Totali i të ardhurave që kanë akumuluar njësitë e vetëqeverisjes vendore nga kjo taksë është afro 18.3 miliardë lekë.
Pra e thënë ndryshe, nga të gjitha bashkitë në vend, Tirana është ajo që arkëton 67.7 për qind të totalit të të ardhurave nga taksa e ndikimit në infrastrukturë nga ndërtimet e reja.
Kjo rritje argumentohet me faktin se në gjysmën e parë të 2025-ës dhe gjatë gjithë vitit 2025 të ardhurat nga ‘taksa e ndikimit në infrastrukturë nga ndërtimet e reja’ nuk u realizuan sipas parashikimit kryesisht në bashkinë Tiranë, si dhe në bashki të tjera, ndoshta si frenim i përkohshëm i procesit të ndërtimeve, frenim i dhënies së lejeve të ndërtimit apo afateve të procedurave të aplikimeve për to. Megjithatë sektori i ndërtimit është një nga sektorët më në zhvillim e me më shumë produktivitet në ekonominë shqiptare e si rrjedhojë rritja e arkëtimit të të ardhurave nga ‘taksa e ndikimit në infrastrukturë nga ndërtimet e reja’ në vitin 2026, vlerësohet se vjen si pasojë e aprovimit të lejeve të ndërtimit në pritje dhe materializimit të pagesave të taksës përkatëse për to. /scan.tv
