Tregu i pasurive të paluajtshme në Shqipëri vazhdon të mbetet një nga temat më të diskutuara në vend, sidomos në Tiranë, ku çmimet e apartamenteve janë rritur ndjeshëm gjatë viteve të fundit. Ndërsa një pjesë e qytetarëve i konsiderojnë pronat të mbivlerësuara për nivelin e të ardhurave në vend, të tjerë besojnë se Shqipëria vijon të mbetet ende një treg relativisht i lirë krahasuar me destinacionet e tjera të rajonit dhe Europës.
Sipas perceptimit të shumë banorëve, apartamentet në zonat qendrore të Tiranës dhe projektet e reja janë bërë gjithnjë e më të paarritshme për familjet shqiptare. Kjo lidhet me rritjen e shpejtë të çmimeve, që në disa raste ka arritur nga 18% deri në 30% në vit gjatë periudhës së fundit. Në të njëjtën kohë, pagat mesatare në Shqipëri vazhdojnë të mbeten relativisht të ulëta, ndërsa çmimet e apartamenteve në kryeqytet kanë arritur deri në 2,000–2,700 euro për metër katror në disa zona.
Sipas studimit të Investropa për shumë të rinj shqiptarë, kursimi për një parapagim apo blerja e një shtëpie po bëhet gjithnjë e më e vështirë. Raporti mes të ardhurave dhe kostos së apartamenteve konsiderohet e lartë, pasi një apartament në Tiranë mund të kushtojë deri në 15 apo 20 herë më shumë se të ardhurat mesatare vjetore të një familjeje shqiptare.
Megjithatë, ka edhe nga ata që argumentojnë se çmimet aktuale janë të justifikuara. Rritja e fortë e turizmit, me mbi 11 milionë vizitorë të huaj gjatë vitit 2025, interesi në rritje nga investitorët e huaj dhe progresi i Shqipërisë drejt integrimit europian po ndikojnë drejtpërdrejt në rritjen e kërkesës për prona.
Sipas studimit, një nga gabimet më të zakonshme të blerësve në Shqipëri vazhdon të jetë blerja e apartamenteve “pa plan ”, pra vetëm mbi bazën e projekteve dhe ofertave, pa verifikuar historikun e kompanisë ndërtuese, lejet e ndërtimit apo kushtet kontraktuale. Kjo ka sjellë raste me vonesa në dorëzimin e apartamenteve ose prona që nuk përputhen me pritshmëritë fillestare të blerësve.
Në të njëjtën kohë, tregu i pronave po ndjen edhe efektet e masave të reja rregullatore. Banka e Shqipërisë ka vendosur standarde më të forta për kreditë e banesave, duke kufizuar nivelin e financimit dhe raportin./Scan
