Pica japoneze po kthehet në trendin më të ri global të gastronomisë, me mediat ndërkombëtare që po e cilësojnë si “revolucionin e radhës” në botën e picës. Nga Tokio në New York, koncepti i njohur si “Tokyo-style pizza” apo “pizza omakase” po fiton popullaritet falë kombinimit të teknikës italiane me precizionin japonez.
Stili japonez i picës dallon për brumin me fermentim të gjatë, pjekjen ultra të shpejtë në temperatura shumë të larta dhe përdorimin e ingredientëve premium. Revista Food & Wine raportoi se kjo lloj pice pritet të “pushtojë” tregun amerikan gjatë vitit 2026, ndërsa restorante të reja me koncept japonez po hapen në New York dhe qytete të tjera të mëdha.
Një nga tendencat më të përfolura është edhe “pizza omakase”, ku klientët lënë në dorën e shefit përzgjedhjen e shijeve, njësoj si në restorantet tradicionale sushi. National Geographic e përshkruan këtë fenomen si një përzierje mes eksperiencës fine dining japoneze dhe kulturës italiane të picës, që po tërheq gjithnjë e më shumë adhurues të gastronomisë moderne.
Ekspertët e industrisë ushqimore thonë se konsumatorët po kërkojnë shije më të rafinuara dhe kombinime ndërkombëtare, ndërsa raportet e fundit mbi trendet e picës për vitin 2026 tregojnë një rritje të ndikimit aziatik dhe të “global fusion” në menutë e restoranteve. /skyweb.al
