Euro ka vijuar rënien në tregun vendas valutor, duke zbritur në nivelin më të ulët historik kundrejt lekut. Sipas kursit zyrtar të publikuar nga Banka e Shqipërisë, monedha europiane u këmbye këtë të premte me 95.34 lekë.
Dobësimi i Euros po vazhdon prej muajsh dhe vetëm që nga fillimi i këtij viti ajo ka humbur rreth 1.5% të vlerës ndaj lekut. Krahasuar me të njëjtën periudhë të një viti më parë, zhvlerësimi arrin në afro 3.3%.
Ekspertët e tregut valutor e lidhin këtë ecuri me rritjen e prurjeve të valutës në ekonomi, kryesisht nga turizmi dhe hyrjet sezonale gjatë muajve të pranverës dhe verës. Tremujori i dytë i vitit tradicionalisht shoqërohet me shtim të ofertës së Euros në treg, duke ushtruar presion mbi kursin e këmbimit.
Agjentët e këmbimit valutor raportojnë se aktualisht në treg ka qarkullim të lartë të monedhës europiane, ndërsa kërkesa për Euro mbetet relativisht e qëndrueshme. Kjo situatë po ndikon që leku të ruajë pozitat e forta ndaj valutës europiane.
Rënia e Euros vijon të favorizojë importet dhe qytetarët që kanë kredi në monedhën europiane, por nga ana tjetër po shton shqetësimet tek eksportuesit dhe sektori i turizmit, të cilët përballen me të ardhura më të ulëta në lekë./skyweb.al
