Kriza në Ngushticën e Hormuzit nuk po shqetëson vetëm tregjet e naftës, por edhe industrinë e aviacionit, pikërisht në prag të sezonit veror. Përmes kësaj korridore kalon një pjesë e rëndësishme e furnizimit global me energji dhe çdo tension në rajon reflektohet menjëherë te çmimi i karburantit të avionëve, kostot e kompanive ajrore dhe siguria operative e fluturimeve.
Edhe pse deri tani nuk ka sinjale për një bllokim të trafikut ajror, pasiguria po rritet.
Linjat ajrore po përballen me kosto më të larta karburanti, ndërsa tregu po bëhet më i paqëndrueshëm.
Kjo mund të sjellë gjatë verës vonesa, ndryshime orari, reduktim frekuencash apo edhe anulime sporadike të linjave më pak fitimprurëse.
Në këtë situatë, ekspertët këshillojnë që udhëtarët të tregohen më praktikë dhe më fleksibël se zakonisht.
Një nga masat më të rëndësishme është zgjedhja e fluturimeve direkte.
Sa më shumë tranzite të ketë një udhëtim, aq më i madh bëhet rreziku që një vonesë apo ndryshim orari të prishë gjithë itinerarin.
Një fluturim i drejtpërdrejtë ul ndjeshëm mundësinë e problemeve zinxhir.
Këshillohet gjithashtu që të shmangen tranzitet shumë të shkurtra mes fluturimeve.
Në një verë me pasiguri operative, një tranzit prej 45 minutash mund të kthehet lehtësisht në humbje fluturimi dhe shpenzime shtesë.
Për ata që nuk kanë prerë ende biletat, fleksibiliteti mund të vlejë më shumë se çmimi më i ulët.
Biletat që lejojnë ndryshim date apo anulim pa penalitete të larta mund të rezultojnë më të sigurta nëse situata përkeqësohet.
Ekspertët sugjerojnë që udhëtarët të monitorojnë vazhdimisht emailin, aplikacionin dhe njoftimet e kompanisë ajrore, jo vetëm agjencinë apo faqet e rezervimeve.
Shpesh ndryshimet e itinerareve publikohen fillimisht nga vetë kompania.
Një tjetër element që po merr më shumë rëndësi këtë verë është siguracioni i udhëtimit.
Në rast anulimesh, vonesash të gjata apo ndryshimesh të detyruara, siguracioni mund të mbulojë pjesë të kostove shtesë për hotel, ushqim apo bileta alternative.
Sipas analistëve të aviacionit, kompanitë low cost mund të jenë më të ekspozuara ndaj krizës së karburantit, pasi funksionojnë me marzhe më të ulëta fitimi.
Kjo nuk do të thotë domosdoshmërisht anulime masive, por mund të sjellë rritje tarifash shtesë, ulje frekuencash apo ndryshime më agresive të çmimeve.
Në këto kushte, disa udhëtarë po orientohen edhe drejt destinacioneve më afër Shqipërisë apo udhëtimeve më të shkurtra, për të shmangur varësinë nga itineraret e gjata dhe tranzitet komplekse.
Industria e aviacionit ka kaluar kriza shumë më të rënda, nga pandemia te mbylljet e hapësirave ajrore, ndaj nuk pritet një paralizë globale e fluturimeve.
Megjithatë, kjo verë mund të jetë më e paqëndrueshme se zakonisht dhe për pasagjerët, përgatitja praktike mund të bëjë diferencën mes një pushimi normal dhe një udhëtimi problematik. /skyweb.al
