Italia pritet të përballet më 18 maj 2026 me një grevë të përgjithshme kombëtare që do të prekë transportin publik, trenat, shkollat, shëndetësinë dhe një pjesë të sektorit privat, duke paralajmëruar një ditë me kaos për miliona qytetarë dhe udhëtarë.
Greva është shpallur nga sindikata bazë USB dhe organizata të tjera sindikale, ndërsa protestat lidhen me kërkesat për paga më të larta, mbrojtje të shërbimeve publike dhe kundërshtimin ndaj politikave të riarmatimit dhe shpenzimeve ushtarake.
Sipas njoftimeve zyrtare, nga ora 21:00 e datës 17 maj deri në orën 20:59 të 18 majit priten anulime dhe vonesa të shumta në rrjetin hekurudhor italian, përfshirë shërbimet e Trenitalia, Italo dhe Trenord. Problemet më të mëdha parashikohen në qytete si Milano, Roma dhe Napoli.
Autoritetet italiane kanë bërë të ditur se do të mbeten aktive fashat minimale të garancisë për udhëtarët, kryesisht nga ora 06:00 deri në 09:00 dhe nga ora 18:00 deri në 21:00 për transportin rajonal.
Greva pritet të ndikojë edhe në autobusë, metro dhe tramvaj në disa qytete italiane.
Në Romë paralajmërohen reduktime të forta të shërbimit të ATAC, ndërsa probleme priten edhe në Napoli, Torino, Bolonjë dhe Venecia.
Në sektorin hekurudhor, kompanitë do të publikojnë listat e trenave të garantuar që do të vazhdojnë qarkullimin edhe gjatë protestës.
Ndërkohë, pasagjerët që heqin dorë nga udhëtimi mund të kërkojnë rimbursim sipas procedurave të kompanive.
Greva do të prekë edhe shkollat dhe sistemin shëndetësor.
Në shkolla mund të ketë mungesa të stafit pedagogjik dhe reduktime të orëve të mësimit, ndërsa në spitale do të garantohen vetëm shërbimet urgjente dhe ato esenciale.
Sindikata USB deklaroi se protesta lidhet me “uljen e vlerës së pagave, dobësimin e shëndetësisë publike, varfërimin e shkollës dhe rritjen e kostos së jetesës”, duke akuzuar qeverinë italiane se po orienton fondet drejt riarmatimit në vend të shërbimeve sociale. /skyweb.al
