Mbërritja e bankës së parë dixhitale në Shqipëri është shoqëruar me polemika të forta në publik duke krijuar jo pak pështjellim edhe tek qytetarët. Por Banka e Shqipërisë siguron se ajo ka bërë të gjitha verifikimet, qoftë për aksionerët, qoftë dhe për burimin e parave të Jet Bank duke garantuar pastërtinë e tyre.
“Kapitali i Jet Bank është hetuar në mënyrën më të hollësishme sipas të gjitha kërkesave që detyron ligji. BSH ka vërtetuar se ky kapital rrjedh 100 për qind nga burime plotësisht të ligjshme,” tha BSH në një përgjigje zyrtare për Kapitali.al.
Banka Qendrore thotë se sipas kërkesave të ligjit, ajo ka verifikuar edhe figurën e 5 aksionerëve të Jet Bank, të cilët rezultojnë sipërmarrës pa asnjë rekord problematik me ligjin.
“I gjithë informacioni, si për aksionerët ashtu dhe kapitalin është në dosjen përkatëse të aprovimit të liçencës së Jet Bank. Por Banka e Shqipërisë nuk mund t’i bëjë publike këto informacione për shkak të kufizimeve, jo vetëm të brendshme ligjore për mbrojtjen e të dhënave, por edhe atyre që imponon kuadri ligjor ndërkombëtar si pasojë e marrëveshjeve që Shqipëria ka me Bashkimin Europian,” deklaron BSH.
Polemikat publike për Jet Bank nisën pas dyshimeve të hedhura publikisht nga deputeti i opozitës Belind Këlliçi për njerëzit që qëndrojnë pas saj. Madje ai ka kërkuar edhe reagimin e Guvernatorit dhe Bankës së Shqipërisë për dyshimet e ngritura.
Por deri më tani BSH ka preferuar të heshtë për të mos hyrë në vorbullën e debateve politike, por edhe për të shmangur atë që do të dukej si rreshtim në krah të një banke private, ndërkohë që BSH mbikqyr dhe është rregullator i 12 bankave që operojnë në sistemin bankar të Shqipërisë.
“Banka e Shqipërisë ka vetëm një detyrim. Të zbatojë me përpikmëri të gjithë kërkesat që detyron ligji për liçencimin e bankave. Dhe këto kërkesa janë zbatuar plotësisht, jo vetëm në këtë rast, por për çdo bankë të liçencuar në Shqipëri,” thotë BSH.
Ndërkohë një tjetër çështje debatesh në lidhje me Jet Bank ka qenë edhe mungesa e eksperiencës, pasi kompanitë dhe pronarët që e zotërojnë atë nuk kanë eksperiencë të mëparshme bankare. Por Banka e Shqipërisë saktëson se nuk janë pronarët ata për të cilët kërkohet eksperienca bankare.
“Ligji e kërkon eksperiencën për stafin drejtues dhe administrativ të Bankës, jo për aksionerët e saj. Për më tepër, shumë nga bankat dixhitale më të mëdha të botës sot nuk kanë patur eksperienca të mëparshme në sektorin financiar, pasi këto banka lindin si biznese të reja start up,” sqaron BSH.
Revolut, një nga bankat më të mëdha dixhitale në botë, lindi si një start up në vitin 2015 në Britaninë e Madhe nga Nikolay Storonsky dhe Vlad Yatsenko, dy sipërmarrës individualë, të cilët më parë nuk kishin qenë ndonjëherë aksionerë bankash. Sot Revolut është fintech-u me vlerën tregtare më të madhe në Mbretërinë e Bashkuar dhe numëron më shumë se 70 milionë konsumatorë në gjithë botë.
Vitet e fundit, dixhitalizimi tashmë është shndërruar në një trend ku po shkon e gjithë bota. Banka e Shqipërisë thotë se fakti që edhe Shqipëria bëhet pjesë e kësaj tendence është pozitiv, pasi vendi nuk mund të mbetet prapa.
“çdo zhvillim që modernizon sistemin e pagesave, ul kostot dhe redukton paranë cash është i mirëpritur, pasi sjell përfitime për ekonominë,” përfundon BSH. /kapitali.al
