Europa po përballet me një valë të pazakontë të nxehti, ku temperaturat në disa vende pritet të arrijnë deri në 40 gradë Celsius, nivele që specialistët i konsiderojnë jo normale për muajin maj. Meteorologët paralajmërojnë se bëhet fjalë për temperatura tipike të mesit të verës, jo të pranverës, çka po shton shqetësimet për efektet e ndryshimeve klimatike.
Vendet më të prekura pritet të jenë Spanja, Portugalia, Italia dhe pjesë të Francës, ku i nxehti ekstrem ka detyruar autoritetet të lëshojnë paralajmërime për qytetarët. Ekspertët theksojnë se këto vlera janë disa gradë mbi mesataren sezonale për këtë periudhë të vitit.
Sipas meteorologëve europianë, temperatura të tilla në fund të majit konsiderohen anormale dhe tregojnë për një intensifikim të fenomeneve ekstreme të motit. Ata paralajmërojnë se valët e të nxehtit po shfaqen më herët se zakonisht dhe me intensitet më të lartë krahasuar me vitet e mëparshme.
Autoritetet në disa shtete kanë bërë thirrje për kujdes të shtuar, sidomos për të moshuarit, fëmijët dhe personat me probleme shëndetësore, ndërsa është rritur edhe rreziku për zjarre në pyje për shkak të temperaturave të larta dhe thatësirës. /skyweb.al
