Shqipëria pritet të ketë në fund të vitit 2027 një pikë të re lidhjeje me gazsjellësin TAP, që do të krijojë mundësinë për përdorimin e gazit në vend. Projekti “Fier South Exit Point” parashikohet të përfundojë në tremujorin e katërt të atij viti, sipas agjencisë azerbajxhanase Report.az, e cila citon kompaninë TAP AG.
Në kuadër të projektit do të ndërtohet një impiant për matjen e gazit dhe reduktimin e presionit, pranë stacionit ekzistues të kompresorëve ACS03 në Fier.
Kjo pikë daljeje do të mundësojë lidhjen e sistemit të transmetimit të TAP-it me infrastrukturën shqiptare të gazit. Ajo konsiderohet një hallkë e rëndësishme për gazifikimin e vendit, duke krijuar ndërfaqen me rrjetin që Shqipëria synon të zhvillojë.
Pas përfundimit, objekti do t’i dorëzohet shtetit shqiptar dhe do të menaxhohet nga pala shqiptare. Sipas informacionit të publikuar, fundi i vitit 2027 është afati i synuar si për përfundimin e punimeve, ashtu edhe për vënien në funksion të pikës së daljes.
Projekti krijon mundësinë teknike që gazi i transportuar përmes TAP-it të kalojë në infrastrukturën vendase, ndërsa përdorimi i tij do të lidhet me zhvillimin e mëtejshëm të kësaj infrastrukture. /skyweb.al
