“Curator Suite 1503” në hotelin RYSE, Autograph Collection në Seul është shtëpia e një krevati gjigant ekstra të gjatë, i cili shtrihet pothuajse në të gjithë gjatësinë e dhomës.
“ Në tokën e gjigantëve ” mund të tingëllojë si fillimi i një përralle, por çfarë nëse do të mund të flije vërtet si një gjigant? Në hotelin RYSE, Autograph Collection në lagjen Hongdae të Seulit, Curator Suite 1503 po sfidon “idetë konvencionale të akomodimit” me një krevat gjigant ekstra të gjatë, që pothuajse përshkon të gjithë dhomën.
E krijuar në bashkëpunim me MSCHF, një kolektiv arti me bazë në Brooklyn, kjo suitë në stil instalacioni artistik përfshin “BED2525”, të konceptuar si një “krevat i gjatë për një gjumë të gjatë në të ardhmen e largët”.
Ideja lindi nga nevoja e dukshme për akomodime më të mëdha dhe më të përshtatshme, ndërsa njerëzit vazhdojnë të bëhen më të gjatë me çdo brez të ri, si edhe për t’u përgatitur për ditën kur gjigantët mund të ecin sërish mbi Tokë.
Muret e suitës janë dekoruar gjithashtu me versione të deformuara të veprës “Spots” të Damien Hirst. Kolektivi artistik ka prerë 108 njolla shumëngjyrëshe në pjesë individuale të kornizuara, duke u dhënë vizitorëve mundësinë të zgjedhin ngjyrën që preferojnë dhe, nëse çmimi është i duhuri, ta marrin një “Spot” me vete në shtëpi.
Për udhëtarët që kërkojnë një qëndrim më konvencional në Seul, suita 1503 e RYSE mund të mos jetë zgjedhja më e zakonshme. Por për ata që janë kuriozë, përfitimet përfshijnë mëngjes për dy persona dhe pajisje si boombox, televizor inteligjent dhe maska fytyre.
Pjesë e grupit Marriott International, hoteli butik përshkruhet si “vizionar” dhe ofron një sërë dhomash, përfshirë Director Suite, Producer Suite, Artist Suite dhe Executive Producer Suite. /skyweb.al
