Kryeministri Edi Rama deklaroi sot se nga Brukseli është vendosur çelja e një fondi të ri prej 49 milionë eurosh në kuadër të Planit të Rritjes për Ballkanin Perëndimor, duke e çuar ndihmën totale të përftuar deri tani në 212 milionë euro. Kreu i qeverisë nënvizoi se kjo shifër është më e larta e përftuar nga të gjitha vendet e rajonit.
“Plani i Rritjes është një plan financimi mbi bazë rezultatesh dhe janë rezultate të certifikuara nga Komisioni Europian, të padiskutueshme në objektivitetin e tyre, sepse, ndryshe nga sa e përflasin ditë e natë ata që në fund gjithmonë humbasin, Shqipëria jonë, Shqipëria europiane që po ndërtojmë, është një histori suksesi,” theksoi Rama.
“Një histori që nuk shkruhet me britma, nuk bëhet me shpifje apo me molotovë, por me vizion, me punë, me durim të madh dhe me përkushtim hap pas hapi, reformë pas reforme. Faleminderit çdo shqiptari dhe shqiptareje që beson, që mbështet dhe që ecën me ne në këtë mision historik,” përfundoi Kryeministri Rama.
