Greqia pritet të jetë një nga fitueset më të mëdha të sezonit turistik veror 2026 në Europë, pasi kërkesa për apartamente me qira afatshkurtër dhe Airbnb po rritet me ritme më të larta se në shumicën e vendeve europiane, ndërsa çmimet po shtrenjtohen ndjeshëm.
Sipas të dhënave të AirDNA, rezervimet për verën 2026 në Greqi janë rritur me 9.3% krahasuar me një vit më parë. Deri tani janë prenotuar rreth 3.9 milionë net qëndrimi për sezonin veror.
Muaji korrik po shënon rritjen më të fortë të kërkesës me 13.5%, ndërsa gushti me 11.4%. Edhe shtatori po rezulton më i fortë se vitet e mëparshme, me një rritje prej 12.4%, duke treguar se sezoni turistik po zgjatet përtej verës tradicionale.
Rritja e kërkesës në Greqi është më e lartë se mesatarja europiane prej 7.8%. Në Portugali rritja është vetëm 5.7%, ndërsa Kroacia ka hyrë në rënie me minus 6.4%, pasi tregu atje po shfaq shenja ngadalësimi pas bumit të viteve të fundit.
Përveç kërkesës, Greqia po kryeson edhe për rritjen e çmimeve. Sipas raportit, vendi ka regjistruar rritjen më të fortë sezonale të çmimeve në Europë.
Çmimi mesatar ditor për një apartament ose Airbnb në Greqi gjatë verës arrin në 174 euro, ndërsa jashtë sezonit bie në 113 euro. Kjo përkthehet në një rritje sezonale prej 54.9%.
Një nga destinacionet që po shtyn më shumë çmimet lart është Mykonos. Në këtë ishull, çmimi mesatar për një natë gjatë verës arrin në 758 euro, nga 458 euro gjatë periudhës jashtë sezonit.
Raporti tregon gjithashtu se tregu europian i qirave afatshkurtra mbetet i fortë edhe pse ekonomia dhe situata gjeopolitike vazhdojnë të krijojnë pasiguri.
Ndërkohë, një pjesë e turistëve europianë po zgjedhin gjithnjë e më shumë edhe vendet e Europës Veriore për shkak të temperaturave më të freskëta dhe destinacioneve më pak të mbingarkuara. Danimarka po regjistron rritjen më të madhe të kërkesës në Europë me 50.9%, e ndjekur nga Polonia, Suedia dhe Norvegjia.
