Drejtoria e Hetimit Tatimor ka nisur hetimet ndaj 100 individëve dhe subjekteve të dyshuara për të ardhura të padeklaruara të përfituara nga aktiviteti në platformat sociale si Facebook, TikTok, YouTube, Instagram, Google dhe PayPal.
Sipas njoftimit zyrtar, nga verifikimet paraprake dyshohet për një shumë të konsiderueshme prej rreth 33 milionë euro të ardhura të paregjistruara. Këto të ardhura lidhen kryesisht me shërbime, reklama, sponsorizime, abonime apo pagesa të tjera që realizohen përmes këtyre platformave globale.
Administrata Tatimore kishte paralajmëruar më herët, më 29 mars, përmes rrjeteve sociale, që individët dhe subjektet të përmbushnin detyrimet ligjore përmes vetëdeklarimit në platformën DIVA 2024. Me nisjen e hetimeve, Drejtoria e Hetimit rikujton të gjithë tatimpaguesit që ende nuk kanë kryer deklarimin, të veprojnë sa më shpejt për të shmangur penalitete dhe masa të tjera ndëshkuese që mund të pasojnë nga kontrolli i thelluar.
Ky zhvillim vjen në kuadër të përpjekjeve të vazhdueshme të administratës tatimore për të monitoruar dhe formalizuar të ardhurat e realizuara përmes aktiviteteve online, të cilat vitet e fundit janë rritur ndjeshëm në volum dhe shtrirje./skyweb.al
