Ilaçi kundër kancerit të prostatës Erleada i kompanisë jnj, i përdorur së bashku me terapinë hormonale që bllokon testosteronin, gjashtë muaj para dhe gjashtë muaj pas operacionit të prostatës, përmirësoi ndjeshëm mundësinë për eliminimin e kancerit dhe uli rrezikun e përparimit të sëmundjes ose vdekjes, sipas të dhënave nga një studim i fazës së avancuar të paraqitur të dielën, shkruan Reuters.
Studimi, i cili ndoqi pacientët për më shumë se pesë vjet, zbuloi se ata që morën këtë regjim trajtimi kishin nëntë herë më shumë gjasa të kishin shumë pak ose aspak kancer të dallueshëm në prostatë në momentin e operacionit, krahasuar me pacientët që morën vetëm terapi për bllokimin e testosteronit.
Shtimi i Erleada-s uli gjithashtu me 20% rrezikun e përhapjes së kancerit ose vdekjes, tha kompania.
Të dhënat u prezantuan në takimin vjetor të American Society of Clinical Oncology në Çikago dhe pritet të ndryshojnë mënyrën se si mjekët trajtojnë burrat me kancer të prostatës me rrezik të lartë, të lokalizuar ose lokalisht të avancuar. Aktualisht, heqja kirurgjikale e prostatës dhe radioterapia konsiderohen trajtimet standarde për këta pacientë.
Sipas Johnson & Johnson, rreth 40% e 330 mijë personave që diagnostikohen çdo vit me kancer të prostatës në Shtetet e Bashkuara klasifikohen si pacientë me rrezik të lartë.
Studimi analizoi gjithashtu një regjim më të gjatë trajtimi, me një vit përdorim të Erleada-s dhe terapisë hormonale para dhe pas operacionit.
Tek këta pacientë, burrat që morën terapinë e kombinuar kaluan mesatarisht më shumë se gjashtë vjet pa pasur nevojë për trajtim të mëtejshëm, pothuajse dyfish më gjatë se grupi që mori vetëm terapi hormonale. Trajtimi më i gjatë me Erleada uli gjithashtu me 29% rrezikun e rikthimit të kancerit dhe vdekjes.
Sipas kompanisë, pothuajse gjysma e pacientëve që trajtohen me metodën aktuale standarde – operacion për heqjen e prostatës dhe radioterapi – përjetojnë rikthimin e sëmundjes dhe kanë nevojë për trajtime shtesë.
Erleada, e njohur kimikisht si Apalutamide, bën pjesë në një klasë ilaçesh të quajtura frenues të rrugës së receptorit të androgjenëve (ARPI), të cilat bllokojnë sinjalet që nxisin rritjen e kancerit të prostatës.
“Aktualisht nuk ka asnjë ARPI të miratuar për kancerin e prostatës me rrezik të lartë dhe të lokalizuar, qoftë në kombinim me kirurgjinë apo radioterapinë. Prandaj, këto të dhëna do të përbënin një ndryshim të madh të paradigmës në trajtim”, tha Mary-Ellen Taplin, studiuesja kryesore e studimit nga Dana-Farber Cancer Institute në Boston. /skywe.al
