Policia e Tiranës ka zbardhur detajet e para të grabitjes së ndodhur këtë të martë në një degë të OTP Bank në kryeqytet.
Sipas informacioneve paraprake, rreth orës 12:26, një person i maskuar ka hyrë në ambientet e bankës në rrugën “Gjin Bue Shpata”. Sipas informacioneve, autori, i veshur me të zeza dhe i maskuar hyri në bankë dhe nën kërcënimin e një arme, ai i është afruar një qytetareje që kishte me vete rreth 15 milionë lekë të vjetra në një çantë të cilat sapo po i depozitonte në bankë dhe ia ka marrë.
Pas kryerjes së grabitjes, autori është larguar menjëherë nga vendngjarja me skuter. Në reagimin e saj, policia bën të ditur se janë ngritur pika kontrolli në zona të ndryshme të qytetit dhe se shërbimet policore po vijojnë veprimet intensive për identifikimin dhe kapjen e autorit.
Grupi hetimor po punon për zbardhjen e plotë të rrethanave të ngjarjes, si dhe për përcaktimin e shumës së parave të grabitura.
Njoftimi:
Rreth orës 12:26, në rrugën “Gjin Bue Shpata”, një shtetas i maskuar ka hyrë në ambientet e një banke dhe, dyshohet se në kërcënimin e një sendi në dukje armë, ka marrë një shumë parash.
Menjëherë pas marrjes së njoftimit, janë ngritur pika kontrolli dhe janë orientuar të gjitha shërbimet policore, për identifikimin dhe kapjen e autorit.
Grupi hetimor po punon për identifikimin e autorit dhe dokumentimin e rastit.
/skyweb.al
