Terapia eksperimentale e kompanisë Legend Biotech (LEGN.O) ka treguar shenja të hershme se qasja e saj për krijimin e qelizave që luftojnë sëmundjen brenda trupit të pacientëve mund të funksionojë për një lloj kanceri të gjakut, njoftoi kompania të martën, raporton Reuters.
Ndryshe nga terapitë tradicionale CAR-T, të cilat kërkojnë që qelizat të modifikohen jashtë trupit, Legend po zhvillon një metodë për t’i gjeneruar ato drejtpërdrejt te pacientët përmes LB2501, një terapi CAR-T in vivo me dy objektiva. Terapia e re është projektuar për të krijuar qeliza CAR-T brenda organizmit të pacientit përmes një infuzioni të vetëm, duke eliminuar nevojën për inxhinierimin dhe prodhimin e qelizave jashtë trupit.
Në studimin e hershëm klinik, i cili është pritur me interes të madh, 12 pacientë me limfomë jo-Hodgkin të qelizave B, në fazë rikthimi ose rezistente ndaj trajtimit, u trajtuan në dy nivele dozimi deri më 1 prill.
Në grupin që mori dozën më të lartë, të dhënat paraprake treguan se të gjashtë pacientët iu përgjigjën trajtimit, ndërsa pesë prej tyre arritën përgjigje të plotë.
Legend nuk publikoi detaje shtesë për nivelet e dozimit dhe tha se të dhëna të tjera do të prezantohen në një konferencë mjekësore më vonë gjatë këtij muaji.
Kompania tha se qelizat CAR-T u zbuluan në gjakun periferik deri në 116 ditë pas trajtimit.
“Duke gjeneruar qelizat CAR-T drejtpërdrejt brenda pacientit, kjo qasje ka potencialin të thjeshtojë ofrimin e trajtimit dhe të zgjerojë aksesin për pacientët që mund të mos kenë mundësi të marrin terapitë tradicionale CAR-T,” deklaroi drejtoresha ekzekutive e kompanisë, Ying Huang.
Edhe pse nevojitet një periudhë më e gjatë ndjekjeje, të dhënat nënvizojnë potencialin e LB2501 si një imunoterapi e gatshme për përdorim dhe e shkallëzueshme për trajtimin e sëmundjeve malinje të qelizave B, tha kompania.
Terapitë tradicionale CAR-T përfshijnë marrjen e qelizave T të pacientit , një komponent kyç i sistemit imunitar, të cilat më pas modifikohen gjenetikisht për të njohur dhe sulmuar qelizat kancerogjene përpara se të riinfuzohen në organizëm.
Legend raportoi se nuk u regjistruan toksicitete kufizuese të dozës, ngjarje serioze të padëshiruara apo raste fatale. Reagime të lidhura me infuzionin u shfaqën te nëntë pacientë, por ato u zgjidhën brenda një periudhe mesatare prej dy ditësh. /skyweb.al
