Transporti detar global po përballet me një periudhë të re pasigurie, ku krizat rajonale mund të kthehen shpejt në goditje për tregtinë ndërkombëtare.
Nga Ngushtica e Hormuzit te Deti i Zi dhe Libia, anijet tregtare po përballen me konflikte ushtarake, sulme kibernetike, mina detare, dronë dhe kërcënime hibride.
Sipas kompanisë së vlerësimit të rrezikut EOS Risk, shqetësimi kryesor nuk është më nëse ka rrezik, por sa shpejt një krizë lokale mund të kthehet në krizë globale për transportin detar.
Ngushtica e Hormuzit mbetet pika më e ndjeshme. Ajo nuk lidhet vetëm me transportin e naftës, por edhe me ekonominë digjitale globale, pasi në këtë zonë kalojnë kabllo nënujore me fibra optike që mbajnë një pjesë shumë të madhe të trafikut botëror të internetit.
Një dëmtim i këtyre kabllove mund të godasë jo vetëm tregun e energjisë, por edhe bankat, logjistikën, komunikimet dhe shërbimet cloud.
Ndërkohë, Deti i Zi është kthyer në një nga zonat më të rrezikshme për lundrimin, për shkak të sulmeve ndaj porteve, përdorimit të dronëve dhe rrezikut nga minat detare që mund të zhvendosen drejt brigjeve të Rumanisë, Bullgarisë dhe Turqisë.
Edhe Libia mbetet vatër pasigurie në Mesdhe. Përplasjet në Zawiya çuan në evakuimin e përkohshëm të tankerëve dhe pezullimin e punës në rafinerinë më të madhe të vendit, duke treguar se portet dhe objektet energjetike mbeten shumë të ekspozuara.
Në këtë mjedis, edhe flota greke është e ekspozuar ndaj rreziqeve të shtuara. Sipas EOS Risk, Greqia nuk mund të mbetet vetëm vëzhguese, pasi zhvillimet në Hormuz, Detin e Zi dhe Libi ndikojnë drejtpërdrejt te tregjet e transportit detar, sigurimet, energjia dhe tregtia ndërkombëtare.
Ekspertët vlerësojnë se transporti detar po hyn në një fazë ku siguria, informacioni në kohë reale, mbrojtja kibernetike dhe parashikimi gjeopolitik janë bërë kushte bazë për funksionimin e industrisë. /skyweb.al
