Një shtetase zvicerane është ndaluar nga autoritetet doganore në pikën kufitare të Thayngenit, në kufirin mes Zvicrës dhe Gjermanisë, pasi po transportonte një ngarkesë të pazakontë me 55 valixhe dhe çanta.
Sasia e madhe e bagazheve, të vendosura në të gjithë mjetin, ngriti dyshime për kontrabandë dhe bëri që autoritetet të bllokonin automjetin për një kontroll të detajuar.
Pas disa orësh kontrollesh manuale të secilës valixhe, doganierët zbuluan se brenda nuk kishte mallra të paligjshme, para të padeklaruara apo sende të ndaluara. Bagazhet përmbanin vetëm rroba dhe sende personale të grumbulluara nga gruaja.
Sipas raportimeve lokale, të gjitha sendet ishin në përputhje me rregullat për importet private, ndaj ndaj saj nuk u mor asnjë masë ndëshkuese.
Rasti tërhoqi vëmendje të madhe në rrjetet sociale për shkak të numrit të pazakontë të valixheve që transportoheshin në një automjet të vetëm.
