Kryeministri Edi Rama ka sulmuar ashpër gazetarin dhe ish-ambasadorin Mustafa Nano, pas kritikave të tij ndaj qeverisë dhe zhvillimeve të fundit politike.
Në një dalje publike, Rama kujtoi momentin kur, sipas tij, Nano kishte shkuar në zyrën e kryeministrit dhe kishte kërkuar të emërohej ambasador, duke i thënë se nuk kishte më fuqi për t’u marrë me vendin.
“Më bën mua moral Mustafa Nano, që erdhi në zyrën time, u shtri në kolltuk dhe më tha: ‘S’kam fuqi për këtë vend dhe dua të bëhem ambasador’. Dhe i thashë: do ta shohim, meqë kemi pasur shkrimtarë ambasadorë”, u shpreh Rama.
Kryeministri tha se Nano u emërua më pas ambasador në Zvicër, por sipas tij, nuk arriti ta çonte deri në fund detyrën.
“Shkoi Muçi në Zvicër, nuk mbajti dot një zyrë ku ishte vetëm me një sekretare, e la detyrën në mes dhe vjen më thotë mua si ta bëj detyrën”, deklaroi Rama.
Rama reagoi edhe ndaj pretendimeve se oligarkët hyjnë shpesh në zyrën e tij, duke e cilësuar këtë si një akuzë të pabazuar.
“Më tregon ai mua se oligarkët hyjnë në mëngjes dhe në darkë në zyrën time. Po ti, mo Muç, spiun i Sigurimit je që e di këtë, kush hyn në zyrën time?”, tha kryeministri. /skyweb.al
