Një studim i ri ka identifikuar 74 variante gjenetike të lidhura me çrregullimet e ankthit, një problem i shëndetit mendor që po bëhet gjithnjë e më i përhapur, veçanërisht te të rinjtë. Mbi gjysma e këtyre varianteve (39) nuk ishin lidhur më parë me ankthin.
Zbulimi vjen nga studimi më i madh i realizuar ndonjëherë në këtë fushë, i cili përfshiu afro 700 mijë pjesëmarrës me origjinë evropiane. Rezultatet janë publikuar në revistën shkencore Nature Human Behaviour.
Hulumtimi u drejtua nga studiues të King’s College London dhe QIMR Berghofer Medical Research Institute në Brisbane, Australi. Sipas autorëve, gjetjet ofrojnë një kuptim më të thellë të bazës gjenetike të ankthit dhe të ndërveprimit të saj me faktorë të rëndësishëm si përvojat jetësore dhe mjedisi social.
Shumë prej gjeneve të identifikuara rezultuan të jenë veçanërisht aktive në tru dhe luajnë rol në komunikimin ndërmjet qelizave nervore. Studimi zbuloi gjithashtu lidhje gjenetike mes ankthit dhe një sërë sëmundjesh të tjera, si depresioni, sindroma e zorrës së irrituar, dhimbjet kronike, sëmundja koronare e zemrës, endometrioza dhe migrena.
Sipas studiuesve, këto rezultate nxjerrin në pah lidhjen e ngushtë mes shëndetit mendor dhe atij fizik. Megjithatë, ata theksojnë se gjetjet nuk provojnë një marrëdhënie të drejtpërdrejtë shkak-pasojë, por hapin rrugë për kërkime të mëtejshme.
Autorët e studimit nënvizojnë se predispozita gjenetike nuk përcakton domosdoshmërisht zhvillimin e ankthit. Një individ me rrezik të lartë gjenetik mund të mos përballet kurrë me këtë çrregullim, ndërsa një person me rrezik më të ulët mund ta zhvillojë atë. Megjithatë, njohja e faktorëve gjenetikë mund të ndihmojë në identifikimin e personave më të ndjeshëm ndaj ndikimeve mjedisore.
Në të ardhmen, këto zbulime mund të kontribuojnë në hartimin e strategjive më efektive për parandalimin, diagnostikimin dhe trajtimin e çrregullimeve të ankthit. skyweb.al
