Të shtunën mbrëma, më 28 qershor, pas orës 21:00, hapësira ajrore e Veriut të Italisë u paralizua për shkak të një defekti të rëndë në rrjetin e transmetimit të të dhënave mbi fluturimet e avionëve.
Si pasojë, dhjetëra fluturime në nisje apo në mbërritje në aeroportet e Milanos (Malpensa dhe Linate), Bergamos (Orio al Serio), Torinos (Caselle) dhe Gjenovës (Cristoforo Colombo) u anuluan, u vonuan ose u detyruan të kthehen në aeroportet e nisjes.
Corriere della Sera raporton se shkaku i ndërprerjes ishte një avari serioze në sistemin E-Net, rrjeti i ndërlidhjes së qendrave radarike italiane dhe të huaja, që përçon të dhëna kritike si pamje radarike, buletine meteorologjike dhe komunikime me kabinat e pilotëve.
Defekti goditi në mënyrë të veçantë zyrat e ENAV në Milano, të cilat mbikëqyrin trafikun ajror në gjithë pjesën veriperëndimore të Italisë.
Në kushte normale, ky qendër kontrolli menaxhon dhjetëra fluturime në orë, por pas avarisë, numri i lëvizjeve ra në zero.
Sipas njoftimeve zyrtare, nuk lejohet asnjë nisje apo ulje, ndërsa përpjekjet për rikthimin e funksionalitetit të sistemit po vijojnë, me vështirësi në identifikimin e saktë të problemit.
ENAV njoftoi se situata nuk pritet të normalizohet përpara mesnatës, ndërkohë që pasojat do të ndihen edhe gjatë ditës së diel.
Fluturimet po ridrejtohen në aeroporte alternative ose po mbahen të bllokuara për orë të tëra, ndërsa udhëtarët raportojnë mungesë informacioni, bagazhe të padorëzuara dhe radhë të gjata në sportele.
Ky është një ndër ndërprerjet më të rënda teknologjike të ndodhur në trafikun ajror italian vitet e fundit, duke nxjerrë në pah sa e ndjeshme është ndërvarësia mes sistemeve radarike.
Një pikë e vetme dështimi është e mjaftueshme për të shkaktuar kaos në të gjithë rrjetin.
Autoritetet ajrore dhe kompanitë ajrore u bëjnë thirrje pasagjerëve që të mos udhëtojnë drejt aeroporteve pa konfirmuar më parë gjendjen e fluturimeve të tyre dhe të kërkojnë informacione të përditësuara nga linjat ajrore përkatëse./skyweb.al
