Furia pas ndërtimit të parqeve fotovoltaike në Shqipëri duket se po hyn në një fazë të re. Shumë prej kompanive që kanë marrë licenca dhe kanë zhvilluar projekte të mëdha diellore tashmë nuk po kërkojnë zgjerim të kapaciteteve, por ndryshim licence për të instaluar njësi akumulimi të energjisë, pra bateri.
Skyweb.al ka konsultuar vendimet e fundit të Entit Rregullator të Energjisë, ku të paktën për pesë licenca është miratuar ose ka nisur procedura për ndryshimin e tyre, me qëllim shtimin e njësive të depozitimit të energjisë elektrike.
Në total bëhet fjalë për projekte fotovoltaike me kapacitet të instaluar prej 325 MW, një fuqi e instaluar jo e vogël në tregun vendas të energjisë.
Më konkretisht, shoqëria “SPV Blue 1” ka marrë miratimin për modifikimin e licencës së centralit fotovoltaik me kapacitet 50 MW, duke shtuar në licencë njësitë e depozitimit të energjisë elektrike si vepra ndihmëse.
Të njëjtin ndryshim ka marrë edhe “SPV Blue 2”, po për një central fotovoltaik me kapacitet 50 MW. Edhe në këtë rast, kapaciteti i prodhimit nuk ndryshon, por licenca plotësohet me bateri për akumulimin e energjisë.
Për “Sunny Side Energy”, ERE ka vendosur nisjen e procedurës për modifikimin e licencës së centralit fotovoltaik 100 MW. Kompania ka kërkuar shtimin e sistemeve të akumulimit dhe depozitimit të energjisë, pa ndryshuar kapacitetin total të centralit.
Një tjetër projekt është “GreeNNat Solar Park Ballsh”, me kapacitet 100 MW. Edhe për këtë kompani, ERE ka nisur procedurën për ndryshimin e licencës, ku ndër elementët kryesorë është shtimi i njësive të depozitimit të energjisë.
Rasti i pestë është “Power Energy”, me central fotovoltaik 25 MW. Edhe kjo kompani ka kërkuar modifikimin e licencës për të shtuar veprat ndihmëse të akumulimit të energjisë elektrike.
Në total, këto pesë projekte përfaqësojnë 325 MW kapacitet të instaluar fotovoltaik, ndërsa vlera e investimit fillestar për një kapacitet të tillë mund të llogaritet mesatarisht rreth 320 milionë euro.
Por lëvizja e fundit tregon se modeli fillestar i biznesit për shumë parqe diellore po ndryshon.
Burime nga tregu i energjisë bëjnë me dije për Skyweb.al se, në kushtet aktuale, kompanitë e kanë gjithnjë e më të vështirë të sigurojnë fitim duke e shitur energjinë gjatë ditës, në momentin kur prodhimi nga dielli është më i lartë.
Arsyeja është se pikërisht gjatë orëve të ditës, kur prodhojnë edhe parqet fotovoltaike, oferta në treg rritet ndjeshëm dhe çmimet bien fort, në disa momente deri afër zeros.
Në këto kushte, synimi i kompanive është që energjinë e prodhuar gjatë ditës ta ruajnë në bateri dhe ta hedhin në rrjet në orët e mbrëmjes apo të natës, kur kërkesa është më e lartë dhe çmimi i energjisë është më i favorshëm.
Pra, bateritë nuk po shihen më si element shtesë teknologjik, por si kusht për ta bërë më të qëndrueshëm financiarisht investimin në parqe diellore.
Megjithatë, kjo lëvizje rrit ndjeshëm koston totale të projekteve. Instalimi i njësive të akumulimit kërkon investime shtesë, teknologji më komplekse dhe financim më të madh nga kompanitë.
Për rrjedhojë, koha e kthimit të investimit zgjatet dhe fitimi bëhet më pak i sigurt sesa ishte parashikuar në fazën e parë të zhvillimit të parqeve fotovoltaike.
Kjo tregon se tregu i energjisë diellore në Shqipëri po hyn në një fazë më të vështirë: Nga periudha e licencimeve dhe entuziazmit për ndërtim, te nevoja për menaxhim më të zgjuar të prodhimit dhe shitjes së energjisë. /skyweb.al
