Në Pashaliman të Vlorës është nënshkruar Memorandumi i Bashkëpunimit mes gjigantit italian të industrisë detare “Fincantieri”, kompanisë shtetërore “KAYO” dhe Shkollës Industriale “Pavarësia”.
Marrëveshja synon zhvillimin e praktikave profesionale dhe krijimin e mundësive të reja të punësimit në sektorin e ndërtimit dhe industrisë detare.
I pranishëm në ceremoninë e nënshkrimit, kryeministri Edi Rama e cilësoi bashkëpunimin si një hap të rëndësishëm për zhvillimin e industrisë detare dhe asaj të mbrojtjes në Shqipëri.
Rama tha se industria ushtarake në vend po hyn në një fazë të re zhvillimi, ndërsa paralajmëroi rritjen e shpenzimeve për mbrojtjen në 2.6% të Prodhimit të Brendshëm Bruto.
“Rrisim në 2.6% shpenzimet për mbrojtjen”, u shpreh kryeministri.
Sipas Ramës, partneriteti në Pashaliman pritet të krijojë 500 vende të reja pune në këtë zonë.
“Janë 500 vende pune që krijohen në këtë territor nga ky partneritet, 500 vende pune që kërkojnë njerëz të kualifikuar. Kërkojnë ekspertizë, vende pune të mirëpaguara”, tha Rama.
Ai shtoi se personat që do të përfshihen në këtë sektor nuk do të vlerësohen vetëm për aftësitë profesionale, por edhe për figurën e tyre, pasi do të jenë pjesë e sistemit të mbrojtjes së Shqipërisë.
Marrëveshja pritet të lidhë arsimin profesional me nevojat konkrete të tregut të punës, duke përgatitur specialistë të rinj për industrinë detare.
Bashkëpunimi me Fincantieri-n synon të mbështesë zhvillimin e një qendre të re industriale detare në Pashaliman./skyweb.al
