Këshilli Kombëtar i Territorit dhe Ujit miratoi në mbledhjen e 17 korrikut një mori lejesh për ndërtime në Tiranë dhe në qytete të tjera të vendit, ku kullat ishin kryefjala e vendimmarrjes.
Në listë përfshihen të paktën 16 leje për ndërtime shumëkatëshe, një pjesë e konsiderueshme e të cilave kalojnë 16 katet dhe janë përqendruar në kryeqytet. Këto projekte shtojnë më tej dendësinë e ndërtimeve të larta, të cilat, për shkak të volumit të madh, kërkojnë hapësira dhe kapitale të konsiderueshme.
Ndërkohë që SPAK po godet raste të pastrimit të parave përmes ndërtimit dhe po zbulon lidhje të grupeve kriminale me këtë sektor, furia e investimeve në kulla duket se nuk ka të ndalur.
Ndërtimi vijon të konsiderohet një nga motorët kryesorë të ekonomisë, ndërsa qeveria duket se vlerëson se frenimi i këtij sektori mund të shkaktojë pasoja të forta ekonomike.
Mes lejeve të shumta të miratuara ndodhet edhe ajo për projektin “M-21”, objekt shërbimi dhe banimi 26 kate mbi tokë dhe 6 kate nëntokë, me vendndodhje në Bashkinë Tiranë, me subjekt zhvillues shoqërinë “Xhek Construction” sh.p.k.
Por një verifikim i kryer nga Skyweb.al në dokumentet e Qendrës Kombëtare të Biznesit ngre pikëpyetje mbi profilin e kompanisë që ka marrë përsipër zhvillimin e kësaj kulle.
“Xhek Construction” rezulton të jetë regjistruar në QKB më 1 prill 2026, vetëm rreth tre muaj e gjysmë përpara mbledhjes së KKTU-së ku u miratua leja për kullën 26-katëshe.
Nga gjurmët dokumentare të deritanishme, projekti “M-21” duket se përbën aktivitetin kryesor për të cilin është krijuar kompania.
Shoqëria zotërohet tërësisht nga Matilda Dyrkaj dhe ka një kapital të regjistruar prej vetëm 500 mijë lekësh, ose afërsisht 6 mijë euro.
Nga verifikimi nuk rezulton që “Xhek Construction” të ketë një histori të mëparshme në sektorin e kullave apo ndërtesave të mëdha. Edhe emri i pronares së vetme nuk lidhet me ndonjë veprimtari të njohur të mëparshme në këtë fushë.
Në faqen e kompanisë janë listuar disa projekte të tjera, mes të cilave “Emma Tower”, një kullë me 35 kate në Vlorë, si dhe dy hotele të vegjël në Itali. Kompania deklaron se hotelet i ka blerë, rinovuar dhe më pas i ka shitur, ndërsa e paraqet veten si të profilizuar në sektorin e ndërtimit.
Megjithatë, kur klikohet në seksionin “Historia e Xhek Construction”, faqja shfaq një gabim dhe nuk jep asnjë informacion për historikun, eksperiencën apo veprimtarinë e mëparshme të shoqërisë.
Kompania e regjistruar më 1 prill nuk ka ende bilanc financiar, përmes të cilit të mund të vlerësoheshin të ardhurat, asetet, detyrimet apo kapaciteti i saj për financimin e projektit.
Dokumenti i vetëm tjetër i gjeneruar nga shoqëria është një vendim i zonjës Matilda Dyrkaj, në cilësinë e pronares së vetme, për ndryshimin e adresës së zyrave të kompanisë.
Skyweb.al ka raportuar edhe raste të tjera të ngjashme, ku kompani të krijuara rishtazi dhe persona pa një profil të njohur në ndërtim shfaqen si zhvillues të projekteve të mëdha, të cilat kërkojnë kapitale të jashtëzakonshme.
Ndërtimi i një kulle me 26 kate mbi tokë dhe 6 kate nëntokë mund të kërkojë dhjetëra, në mos qindra milionë euro, në varësi të sipërfaqes, cilësisë së punimeve dhe specifikave të projektit.
Në aritmetikën e zakonshme të tregut, duket e vështirë që një shoqëri me kapital prej vetëm 500 mijë lekësh, pa bilanc financiar dhe pa histori të dokumentuar në ndërtim, të zotërojë vetë ekspertizën dhe kapacitetin financiar për një projekt të këtyre përmasave.
Kapitali i ulët i regjistruar nuk përbën në vetvete shkelje ligjore. Megjithatë, diferenca mes profilit të kompanisë dhe përmasave të kullës kërkon transparencë mbi financuesit, kapacitetet teknike dhe mënyrën se si do të realizohet investimi.
Por, siç ka ndodhur edhe në raste të tjera, çuditë në tregun shqiptar të kullave duket se nuk kanë të sosur. /skyweb.al
