Në tremujorin e parë të vitit 2026, vendet e Bashkimit Europian urdhëruan largimin e 108,475 shtetasve nga vendet jashtë BE-së.
Sipas të dhënave të Eurostat, gjatë së njëjtës periudhë 34,550 persona u kthyen në vende të treta pas marrjes së urdhrit për largim.
Krahasuar me tremujorin e parë të vitit 2025, numri i shtetasve jo-europianë të urdhëruar për t’u larguar ra me 12.8%.
Ndërkohë, numri i personave të kthyer në vende të treta u rrit me 8.1%.
Në raport me tremujorin paraardhës, urdhrat për largim ranë me 7.9%, ndërsa kthimet u rritën me 2%.
Shtetasit që morën më shumë urdhra largimi nga vendet e BE-së ishin nga Algjeria, me 11,105 raste.
Pas tyre renditen shtetasit e Marokut me 6,435 raste dhe ata të Sirisë me 5,355 raste.
Sa i përket personave të kthyer në vende të treta, në krye janë shtetasit e Turqisë me 3,555 raste.
Më pas vijnë shtetasit e Gjeorgjisë me 2,060 raste dhe ata të Shqipërisë me 2,050 raste.
Kjo e rendit Shqipërinë ndër tre vendet kryesore për nga numri i shtetasve të kthyer nga BE-ja pas urdhrit për largim.
Vendet e BE-së që dhanë më shumë urdhra largimi ishin Franca me 34,880 raste, Gjermania me 10,360 dhe Spanja me 9,275.
Ndërsa për kthimet efektive, Gjermania kryesoi me 7,300 persona të kthyer, e ndjekur nga Franca me 3,775 dhe Polonia me 2,660.
Të dhënat tregojnë se, edhe pse urdhrat për largim kanë rënë, vendet e BE-së kanë rritur numrin e kthimeve të ekzekutuara.
